domingo, 19 de abril de 2026
A Xunta de Galicia reivindica o papel das rexións no desenvolvemento de Europa e reclama o seu protagonismo no novo marco financeiro plurianual. Así o explicou hoxe o director xeral de Cohesión e Fondos Europeos da Consellería de Facenda e Administración Pública, Ángel Tarrío Tobar, en sede parlamentaria, onde deu conta do desenvolvemento dos Fondos Europeos en Galicia, correspondentes ao orzamento da Unión Europea do Período 2021-2027.
O Goberno galego xestiona algo máis de 4.000 millóns de euros (4.058 M) de fondos europeos de xestión compartida, dos que 1.575 M son fondos de cohesión, mentres que 2.117 M son da Política Agraria Común e 366 M corresponden á pesca. Isto supón o 70% dos fondos asignados a Galicia, tendo en conta que máis da metade dos fondos de cohesión, FEDER e FSE+ destinados á nosa Comunidade os xestiona directamente a Administración central, polo que a Xunta aspira a unha maior capacidade de xestión dos recursos asignados ao noso territorio.
Ángel Tarrío explicou que, tras o peche dos programas do período 2014-2020 coa execución do 100% dos fondos de cohesión aos que se incorporaron 440 M de REACT, a Xunta está a cumprir co desenvolvemento dos programas do período 2021-2027. De feito, no primeiro test efectivo da capacidade de execución financeira, que se levou a cabo no 2025, Galicia cumpriu coa senda financeira dos programas dos fondos europeos do período 2021-2027.
Distintas tipoloxías de fondos
O director xeral de Cohesión afondou na súa intervención nas distintas tipoloxías de fondos europeos, distinguindo entre os fondos de xestión compartida coa Comisión Europea, como é o caso dos fondos de cohesión e os sectoriais de agricultura e pesca, fronte aos de xestión directa da Comisión ou os de xestión indirecta, como o Mecanismo de Recuperación e Resiliencia (MRR).
No que se refire ao Plan de Recuperación, Transformación e Resiliencia, Ángel Tarrío destacou que se caracteriza pola súa centralización e a ausencia dunha cogobernanza real coas Comunidades Autónomas, que se converten, deste xeito, en meros órganos executores dos proxectos definidos polos distintos ministerios.
Así, as CC.AA. xestionan o 36% do tramo de subvencións do Plan, e a Galicia correspóndelle o 6% do total das Comunidades. Tarrío lembrou que a Xunta acadou, a 31 de decembro de 2025, os 1.449 millóns de euros adxudicados dos fondos do Mecanismo de Recuperación e Resiliencia que lle foron asignados, o cal representa o 93% do importe publicado en convocatorias e licitacións e o 88% do ingresado.
O director xeral de Cohesión e Fondos Europeos subliñou que o Goberno galego está a facer unha xestión dilixente dos distintos fondos europeos que, agás o Mecanismo de Recuperación e Resiliencia, executaranse durante esta década. Lamentou, pola contra, a falta de colaboración do Goberno central no que respecta ao desenvolvemento dos programas do MRR, tanto pola falta de cogobernanza como pola ausencia de información nos prazos de execución ou nas modificacións dos fitos e obxectivos establecidos no Plan, como o demostra o feito de que non se convoque desde 2021 o órgano de coordinación coas CC.AA.
De cara ao novo marco financeiro plurianual 2028-2034, Ángel Tarrío incidiu na demanda dunha descentralización que poña ás rexións no centro da toma de decisións, mantendo unha política de cohesión robusta, que aproveite a experiencia e o coñecemento das CC.AA. na xestión dos fondos.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
