jueves, 5 de noviembre de 2026
Galicia pechou febreiro de 2026 con 116.058 persoas no paro, 4.919 menos que no mesmo mes de 2025, e 1.088.231 afiliacións á Seguridade Social, 16.283 cotizantes máis en relación con febreiro do ano pasado. Así o destacou hoxe o secretario xeral de Emprego e Relacións Laborais, Pablo Fernández, durante a valoración dos datos de paro e de afiliacións, que en ambos casos son os mellores para un mes de febreiro desde que hai rexistros.
En relación coa evolución anual, a baixada no desemprego supón algo máis do 4%. Ademais, o paro tamén se reduce nas catro provincias galegas e en todos os sectores de actividade, liderando a baixada a construción (-8,97%), seguida do sector primario (-8,69%), da industria (-6,10%) e, por último, dos servizos (-3,13%).
En canto aos colectivos prioritarios, tanto no caso das mulleres como no dos parados de longa duración, rexístrase a cifra máis baixa de desemprego para un mes de febreiro de toda a serie (maio 2005). No caso das mulleres desempregadas a redución anual é de 2.641 persoas (-3,77%) e no dos parados de longa duración a baixada é de 3.460 (-5,85%).
Pablo Fernández especificou que na comparativa mensual rexístrase unha lixeira subida no paro (+0,79 %), un incremento que tamén se produce no resto do Estado. O secretario xeral insistiu en que a evolución do mercado laboral debe analizarse desde unha perspectiva a medio e longo prazo e que os datos amosan que a tendencia sostida no tempo continúa a ser positiva, consolidando os mellores datos históricos nun mes de febreiro.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
