viernes, 20 de febrero de 2026
Dos 72 sendeiros azuis galegos, 20 reciben este ano o galardón por primeira vez. En concreto son os seguintes: senda dos Muíños do río Medio, en Miño; Ruta Quintá-río Donsal, en Becerreá, Navia de Suarna e Cervantes; senda perimetral Bao-Xastelas, na Illa de Arousa; senda dos Muíños de Lores, en Meaño; sendeiro fluvial do río Louro, en Mos; e o sendeiro con da Romaíña-con da Ventureira, en Sanxenxo. Ademais, o Concello de Vigo suma nove sendeiros locais novos, que son os de Candeán, Cabral, Bembrive-Beade, Coruxo, Matamá-Comesaña, Oia, Saiáns, Valadares e Zamáns.
A maiores, este ano incorpóranse a esta rede, cinco novos sendeiros termais e de saúde na provincia de Ourense -Arnoia, Laias (Cenlle), Lobios, O Carballiño e Ribadavia-. Estes recorridos combinan deporte, ocio e benestar e, ao mesmo tempo, contribúen á recuperación e posta en valor do patrimonio natural e cultural. Tamén son rutas accesibles que animan a desfrutar da natureza e a practicar hábitos saudables.
Este galardón ten gran relevancia para atraer visitantes á Comunidade e promover un turismo de natureza e, á vez, o uso público e sostible dos espazos naturais, promovendo o seu coñecemento a través das múltiples rutas que axudan a percorrelos e coñecer a beleza e rica biodiversidade que albergan.
En canto aos datos a nivel nacional, en 2026 galardoase o maior número de Sendeiros Azuis (194) desde a posta en marcha do programa e supéranse xa os 1.200 quilómetros de sendas no conxunto do país.
En todo caso e aínda que hoxe se fixo pública a relación completa de galardoados en 2026, o acto de entrega oficial das bandeiras aos concellos con Sendeiros Azuis realizarase en Cullera (Valencia) o vindeiro 6 de marzo.
Obxectivos principais
Cómpre lembrar que o programa Sendeiro Azul premia e recoñece cada ano a recuperación e posta en valor de rutas, sendas e itinerarios peonís mediante a súa transformación en contornas respectuosas, resilientes e sostibles.
Nesta liña, entre os principais obxectivos da iniciativa inclúense o fomento da conectividade ecolóxica e a restauración ambiental; a contribución coa análise de fontes cartográficas e de datos á planificación e xestión de zonas naturais; o fortalecemento da coordinación entre as administracións con competencias nestes espazos; a integración transversal de aspectos económicos, ambientais e sociais, e a mellora do coñecemento e sensibilización ambiental.
Ademais, realízase unha revisión periódica dos seguintes aspectos: características das sendas e trazados; estado da información, sinalización e infraestruturas; conservación e xestión do patrimonio natural e cultural, e uso público e desfrute.
Galicia propón este ano 119 praias 45 na Coruña, 17 en Lugo, 56 en Pontevedra, e unha en Ourense como candidatas ao galardón Bandeira Azul 2026. Galicia é a terceira comunidade que formalizou máis candidaturas este ano, por detrás da Comunidade Valenciana e Andalucía, que presentaron 160 e 155 praias. En canto ás provincias, Pontevedra é a segunda con máis candidaturas propostas só por detrás de Alacante. Ademais, este é o primeiro ano no que se presenta a candidatura dunha praia fluvial na provincia de Ourense. Para acadar este recoñecemento nas praias deberá acreditarse unha calidade das augas excelente, unhas boas condicións de seguridade, servizos e accesibilidade, e unha atinada xestión medioambiental.
A taxa de positividade do virus respiratorio sincitial sitúase no 10 % na semana 7 do ano, que rematou o día 15 deste mes. Na semana recollida no informe, observouse un descenso da taxa de consultas no grupo dos menores de dous anos. En canto ás hospitalizacións, rexistráronse dous ingresos no grupo de nados entre abril e setembro de 2025 pero non se produciu ningunha hospitalización nos lactantes menores de dous meses. Nestes grupos, a cobertura da inmunización fronte ao VRS é do 92,6 % no caso dos bebés que son vacinados nos hospitais galegos ao nacer dentro das datas da campaña e do 95,3 % para os nados fóra de campaña.
