sábado, 31 de enero de 2026
O conselleiro de Cultura, Lingua e Xuventude, José López Campos, acompañado polo director xeral de Cultura, Anxo M. Lorenzo, inaugurou hoxe na Biblioteca de Galicia a exposición Siro. A vida nun lápis coa que a Xunta de Galicia, en colaboración coa Asociación Galega de Profesionais da Ilustración, celebra o Día da ilustración, unha efeméride que se celebra na data de nacemento de Castelao e que este ano está dedicada a Siro López (Ferrol, 1943), un dos grandes debuxantes da Comunidade, aínda en activo.
Na súa intervención, o responsable autonómico de Cultura fixo fincapé no gran labor deste autor que traballou arreo para pór en valor a arte en chave humorística e fortalecer o tecido de debuxantes en Galicia ao longo dos anos. Así mesmo, López Campos salientou todos os campos artísticos que cultivou Siro, que van desde a caricatura política ata o teatro ou o xornalismo, pasando pola pintura e o humor gráfico.
Tal e como explicou o conselleiro, a mostra, comisariada pola técnica da Biblioteca de Galicia Charo Crespo e coa colaboración da Asociación Galega de Profesionais da Ilustración, está composta por máis de 50 pezas pertencentes aos fondos da Biblioteca de Galicia e por material de debuxo cedido polo homenaxeado que reflicten a diversidade artística deste artista ao longo de toda a súa traxectoria.
Un dos ilustradores máis coñecidos en Galicia
Siro López comezou a traballar como delineante na empresa metalúrxica Bazán, máis axiña foi quen de arriscarse para dedicarse de cheo ao mundo da ilustración. A partir de aí, encheu páxinas de diversas publicacións de debuxos, artigos de arte, cultura e humor, salientando o gran traballo que desenvolveu entre 1985 e 2006 en La Voz de Galicia como caricaturista político.
Ademais, xunto con outros debuxantes da Comunidade, como Xaquín Marín, participou nunha serie de iniciativas que abriron novas posibilidades profesionais aos humoristas gráficos galegos, como o manifesto En defensa do humor, a publicación da revista Can sen dono, o Museo do Humor de Fene, ou a Praza do Humor da Coruña.
Malia que é fundamentalmente recoñecido como caricaturista político e humorista gráfico, Siro é tamén un destacado retratista, debuxante e pintor. De feito, a súa creatividade non queda só restrinxida ao ámbito das belas artes, xa que ao longo da súa traxectoria profesional tamén se revelou como un artista da palabra. O xornalismo, o ensaio ou incluso o teatro son eidos nos que o humor de Siro deixou a súa pegada.
Todas estas facetas do autor están reflectidas na exposición da Biblioteca de Galicia, que pode visitarse de balde ata o vindeiro mes de maio, e que tamén acolle os traballos de Agustina Shuan, Santy Gutiérrez e Tamara Baz, artistas que foron seleccionados pola Asociación Galega de Profesionais da Ilustración para reinterpretar a obra de Siro.
Un día para lembrar aos grandes do debuxo
O Día da Ilustración naceu co obxectivo de poñer en valor e reivindicar o papel dos profesionais gráficos na cultura galega a través da homenaxe anual a un ilustrador ou ilustradora da Comunidade. Creado en 2014, este día toma como referencia o nacemento de Alfonso Rodríguez Castelao e forma parte do Calendario do Libro e da Lectura, promovido pola Consellería de Cultura, Lingua e Xuventude. Desde entón, figuras como Lolita Díaz Baliño, Federico Ribas, Chichi Campos, Reimundo Patiño ou Xosé Vizoso, primeiro autor en vida ao que se lle dedicou este día, foron recoñecidos pola súa traxectoria e contribución ao mundo das artes gráficas.
Ilustración: siroartista.es
O Centro Galego de Arte Contemporánea foi elixido como insignia da cultura galega en 2025 polo Observatorio da Cultura da Fundación Contemporánea, o prestixioso informe elaborado coas valoracións de máis de 400 expertos e profesionais de toda España que mantén a Galicia como a sexta comunidade pola calidade e innovación da súa oferta, e superando por primeira vez o 20% dos votos. A Cidade da Cultura ocupa o segundo posto, mentres que Centro Dramático Galego comparte a terceira posición da clasificación co Festival Internacional Outono de Teatro, o Festival Sinsal e a Bienal de Pontevedra.
Galicia vén de pechar o ano 2025 cunha taxa abandono escolar do 10,4%, o que supón 0,4 puntos menos que o ano anterior e coloca á nosa Comunidade 2,4 puntos por debaixo da media estatal (que é do 12,8%), polo que se sitúa entre as autonomías cun mellor resultado neste eido. Así pois, no último ano Galicia reduciu o dobre que o Estado esta variable que mide a porcentaxe de persoas entre 18 e 24 anos sen titulación superior á ESO. No que atinxe aos datos por sexos, a taxa é case o dobre no caso dos homes que das mulleres (13,5% fronte a 7,2%), polo que a Consellería de Educación, Ciencia, Universidades e FP establece medidas especiais no Plan FPGal360 para actuar neste colectivo.
