Noticias

Un observatorio de prezos e un plan de control específico e de impulsión dos produtos galegos ante o acordo UE-Mercosur

O presidente da Xunta, Alfonso Rueda, anunciou que o Executivo autonómico vai poñer en marcha 'unha serie de medidas, a curto e medio prazo, para dar certezas e estabilidade ao sector agrícola' en relación co acordo entre a Unión Europea e Mercosur e futura Política Agraria Común (PAC), e lembrou que o tratado pode entrar en vigor de xeito provisional e sen as garantías explícitas no Regulamento de salvagardas. Rueda salientou que a Xunta seguirá insistindo en que é fundamental que calquera tipo de acordo 'garanta que todos os produtos agroalimentarios que entren en Galicia cumpren cos mesmos requisitos que os que se elaboran aquí'.

Entre as iniciativas máis destacadas figuran o desenvolvemento dun amplo plan de control específico en Galicia sobre os produtos importados e a posta en marcha do Observatorio de Prezos de Galicia. Rueda indicou que os controis realizados na comunidade vixiarán 'a presenza de substancias non permitidas, as condicións sanitarias dos produtos ou a súa correcta etiquetaxe e trazabilidade' e explicou que xa se está a traballar nun observatorio para facer un 'seguimento do mercado para os produtos agroalimentarios'.

Ademais, o presidente indicou que a Xunta tamén levará a cabo o reforzo da estratexia de promoción dos produtos galegos, de cadea de distribución curta e de proximidade; o desenvolvemento dunha estratexia de impulso a exportacións de produtos da nosa comunidade co fin de aproveitar as oportunidades dos novos mercados; ou a realización de campañas de sensibilización dos consumidores para incrementar o consumo da produción propia.

Por outra parte, e a maiores das accións propias, solicitarase ao Goberno central e á Comisión Europea que non poñan en marcha de xeito provisional o acordo mentres non queden blindadas as garantías para os agricultores e gandeiros contempladas no Regulamento de salvagardas, actualmente sen aprobar, e demais cuestións aínda a debate no marco da UE. Tamén se lle pedirá ao Goberno un maior reforzo dos controis de fronteira e que defenda tamén a inclusión de máis DO e IXP galegas protexidas no acordo, posto que actualmente só hai contempladas dúas e Galicia é a terceira comunidade de España con máis indicativos de calidade certificada.

Así mesmo, pedirase á Comisión europea o incremento do fondo de continxencia para crise, así como unha maior dotación de financiación na PAC para paliar os posibles efectos sobre o sector primario europeo. Sobre este mesmo asunto, o decálogo de medidas tamén contempla o impulso a unha fronte ampla con organizacións profesionais agrarias e con comunidades autónomas ante a futura PAC en defensa do sector primario, unha Política Agraria Común que debería contar con máis fondos, cos dous piares diferenciados e con menos requisitos e burocracia. 'Os fondos non poden diminuír', reiterou Rueda.

Contacto continuo co sector

Cómpre lembrar que a Consellería do Medio Rural mantivo nas últimas semanas un contacto permanente cos diferentes axentes do sector primario para poder estudar, en conxunto, as implicacións do acordo UE-Mercosur para Galicia. Este paquete de dez medidas, ao que se lle poden sumar máis co paso do tempo, buscan protexer e defender os intereses dos agricultores e gandeiros galegos.

Outra actuación salientable será o reforzo da estratexia de promoción dos produtos galegos, de cadea de distribución curta e Km0. Farase a través de accións de apoio ao sector produtor, nos principais lineais de distribución e tamén por medio do fomento de feiras e actos que impulsen os produtos galegos, con especial fincapé naqueles con marca de calidade. Esta iniciativa complementarase coa realización de campañas de sensibilización dos consumidores respecto ao consumo de produtos galegos, que son emblema de bo facer, calidade e sustentabilidade social e ambiental.

Así mesmo, implementarase unha estratexia de impulso a exportacións de produtos galegos, especialmente daqueles sectores que poden aproveitar máis a oportunidade do acordo UE-Mercosur, como poden ser, por exemplo, os queixos ou o sector vitivinícola.

Implicacións do acordo para Galicia

O acordo ten implicacións que deben ser analizadas con atención, especialmente no caso de Galicia, pois é unha rexión cun sector agroalimentario altamente desenvolvido e cunha importante concentración de explotacións familiares, que por outro lado son cada vez máis modernas e punteiras. Por tanto, este paquete de medidas específico responde á defensa e impulso do sector primario galego que vén facendo a Xunta de Galicia de xeito constante ante novos escenarios.

No informe avaliado hoxe polo Consello da Xunta sinálase que as oportunidades do acordo UE-Mercosur para Galicia céntranse principalmente en exportacións de produtos de alta calidade, acceso a materias primas para o gando máis económicas ou cooperación e transferencia tecnolóxica.

R., 2026-01-26

Actualidad

Foto del resto de noticias (autopista-ap9.jpg) A conselleira de Vivenda e Planificación de Infraestruturas, María M. Allegue, instou ao Goberno central a paralizar a suba dos prezos da AP-9 para 2027 e que os conxele como a Xunta fará coas autoestradas de titularidade autonómica. Allegue respondeu a unha interpelación sobre a situación da autoestrada no Parlamento autonómico, e apuntou que a suba prevista para AP-9 e AP-53 é dun 5% e un 4% respectivamente, o que as converte nas máis caras de España. Incidiu en que nesta lexislatura houbo un incremento dun 20% nos prezos mentres que nas da Xunta non houbo ningún aumento.
Foto de la tercera plana (agro-tractor.jpg) A conselleira do Medio Rural, María José Gómez, reclamou en Bruxelas 'financiamento suficiente, estabilidade e seguridade' para a nova PAC. Foi durante a súa intervención no evento da Coalición Agriregions, no Comité Europeo das Rexións, no que estivo acompañada polo director xeral da PAC e do Control da Cadea Alimentaria, Juan José Cerviño. Na organización da xornada tomou parte a Fundación Galicia Europa, que prestou apoio técnico á delegación galega na capital comunitaria para participar nesta reunión conxunta con membros do Parlamento Europeo e do devandito Comité das Rexións.

Notas

O Instituto Galego de Física de Altas Enerxías (IGFAE), centro mixto da USC e a Xunta de Galicia, organzia do 23 ao 27 de novembro a novena edición da Semana da Ciencia, a cita anual coa que pretende achegar o seu labor investigador á sociedade. Nesta ocasión, o programa centrarase nos retos e oportunidades de futuro que se abren nas áreas de investigación nas que traballa o persoal do IGFAE.
Ata o 12 de xaneiro de 2027 a Sala Alterarte, o espazo expositivo do campus de Ourense, acolle a mostra Glaciares a derreterse, da artista italiana Cinzia N. Rojas e comisariada por Vítor Nieves e Xosé Lois Vázquez. Na exposición, o público visitante pode ver unha proxección sobre o desexo glaciar. A mostra foi inaugurada contando coa participación da artista.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES