Noticias

Rueda asegura que o novo modelo de financiamento rompe 'principios irrenunciables' como a solidariedade e a igualdade entre comunidades

Así mesmo, destacou que 'máis da metade, o 55% dos recursos a maiores que se poñen no novo modelo, correspóndenlle a unha soa comunidade autónoma que, casualmente, é a que negociou co Goberno, polo que unha vez que se puxeron de acordo, agora pretenden que todas as demais, co que sobrou, empecemos a discutir e a pelexarnos'.

Así, reclamou unha revisión do sistema negociada en igualdade no consello de Política Fiscal e seguindo os principios da Declaración de Santiago que asinaron oito comunidades –entre elas A Rioxa– en 2021. 'Galicia non vai discutir, vai seguir insistindo en que é necesario sentarse conxuntamente e estar o tempo que faga falta ata que cheguemos a un modelo que nos sirva a todos', insistiu.

Nese sentido, destacou a oposición unánime do resto de comunidades á proposta realizada polo Ministerio de Facenda –salvo Cataluña–, 'algo que non é fácil', e lembrou que o novo modelo proposto rebaixa a ponderación de dúas variables críticas en Galicia para o encarecemento da prestación de servizos públicos como son a dispersión e o avellentamento.

Nova mouteira en Logroño

Alfonso Rueda aproveitou a súa viaxe á capital rioxana para participar na inauguración dunha nova mouteira do Camiño de Santiago nas inmediacións da Concatedral de Santa María La Redonda, co fin de seguir promovendo e divulgando a ruta xacobea.

O titular da Xunta lembrou que o pasado 2025 pasará á historia como o ano no que máis peregrinos se rexistraron, con 530.987 Compostelas outorgadas. Ademais, o Camiño Francés sigue sendo a ruta máis transitada, con 242.175 peregrinos rexistrados (un 3% máis que o ano anterior). 'Pois ben, deses case 250.000 peregrinos, non menos de 60.000 eran de longo percorrido e antes de chegar á Catedral atravesaron moitos lugares, entre eles A Rioxa e, por suposto, a cidade de Logroño', destacou.

Con todo, asegurou que o Goberno galego xa traballa intensamente no Xacobeo 2027 para que siga a ser emblema dunha marca internacional como é Galicia Calidade. 'Queremos que o ano 27 sexa un ano moi especial, polo que apostamos por facer unha gran programación cultural de difusión e tamén de integración con todas as comunidades de España que teñen algún dos camiños recoñecidos oficialmente', sinalou Rueda, asegurando que o obxectivo é que 'xa este ano, pero especialmente o que vén, a celebración do Xacobeo se note non só en Galicia, senón tamén no resto dos territorios e, especialmente, nos que teñen esa identidade tan xacobea como é A Rioxa'.

Visita CIPFP Camino de Santiago

Así mesmo, o presidente da Xunta tamén visitou a Escola de Hostalería e Turismo da Rioxa, CIPFP Camino de Santiago, en Santo Domingo de la Calzada, que comparte con Galicia, a través do CIFP Carlos Oroza de Pontevedra, un proxecto de excelencia centrado na innovación e sustentabilidade, destacando a colaboración para a economía circular e o aproveitamento de produtos locais, unindo así a FP galega e rioxana na vangarda hostaleira.

Unha visita que serviu 'para ver a colaboración que estamos a facer nunha aposta dobre: primeiro pola formación profesional, xa que creo que tanto en Galicia como na Rioxa temos claro que na potenciación da FP está o futuro de moitos sectores económicos polo que temos que coidalo especialmente; e, ao mesmo tempo, pola gastronomía', asegurou.