miércoles, 11 de marzo de 2026
O teatro segue centralizando a meirande parte desta axenda cultural, con 236 funcións ata xuño, a primeira das cales terá lugar mañá mesmo no Auditorio Municipal Gustavo Freire de Lugo con Manual de patronaxe, de Teatro do Noroeste. A programación deste semestre complétase con 29 actuacións de danza, as devanditas 23 de música, 12 de circo e 7 de maxia.
Estreas de producións galegas
A Rede Galega de Teatros e Auditorios volve funcionar, así mesmo, como unha das principais plataformas de exhibición dos novos espectáculos galegos diante do público, de xeito que son sete as estreas que acollerá durante esta primeira metade do ano.
A primeira delas será a de Ninguén tira fotos nos enterros, de Carlota e Compañía, no Teatro Rosalía Castro da Coruña este venres, día 16. En febreiro, o día 6, chegarán A historia vaxenial, de Artyc Content, ao Rosalía da Coruña, e BenQuerer, de Fran Sieira Compañía de Danza en coprodución co Centro Coreográfico Galego e xunto ao dúo musical Caamaño&Ameixeiras, ao Teatro Principal de Santiago de Compostela. O día 27 será a quenda de Bio Construción, de Ibuprofeno Teatro, na Casa da Cultura do Milladoiro, e de Riazor Ostia, de Os Náufragos, no Teatro Rosalía Castro.
Propostas para todos os públicos
Xunto con estas compañías, a proposta de artes escénicas ofrece unha ampla escolma de formacións con presenza recorrente no circuíto, combinando espectáculos de creación contemporánea, de repertorio e propostas familiares, producidos na súa meirande parte co apoio da Xunta a través da convocatoria anual de subvencións á creación escénica.
Entre as formacións con maior circulación figuran Malasombra con títulos como O Proceso, Testosterona ou Bernarda; Producións Teatrais Excéntricas con As desterradas, Monstros e Mofa e Befa: os dous de sempre; Talía Teatro con Un Deus salvaxe e Voa, Voa!, ademais da estrea de Artur Ui, o ovo da serpe; e Ibuprofeno Teatro con Reconversión e Bio Construción.
En canto ao apartado musical, Unto Vello, Os Carunchos, Terrae, Lembra Xabarín, De Vacas, Habana Café Son ou Xisco Feijoo son algunhas das propostas artísticas programadas neste primeiro semestre.
30 anos de traxectoria
A Rede Galega de Teatros e Auditorios cumpre este ano tres décadas de actividade, que se iniciou a partir da sinatura en maio de 1996 dun acordo marco entre a Xunta, os concellos das sete cidades galegas, a Deputación Provincial de Ourense e a antiga Caixavigo.
A súa primeira carteleira, integrada por 11 compañías, foi o punto de partida dun crecemento rápido que incorporou axiña outros 30 concellos e consolidou a Rede, xa nos seus primeiros anos de funcionamento, como o principal circuíto para a exhibición da produción escénica galega de carácter profesional, á que buscaba dotar de estabilidade na súa programación habitual.
Galicia rexistrou nos meses de decembro, xaneiro e febreiro o inverno meteorolóxico máis húmido do último cuarto de século. A precipitación media ascendeu ata os 800 litros por m2. Uns valores cuxo precedente máis recente se remonta aos anos 2000-01 e que supoñen un incremento do 81% respecto ao habitual neste período. Así, foi o cuarto inverno máis chuvioso da serie histórica. En concreto, decembro non tivo unha anomalía de choiva moi notable, pero xaneiro e febreiro foron meses moi húmidos con anomalías do 98% e do 160% superiores aos valores normais nestes meses, respectivamente. En canto ás temperaturas, vivimos un inverno cálido, aínda que foi bastante máis frío que os dous anteriores.
O titular do Goberno galego, Alfonso Rueda, trasladou esta mañá á Comisión Europea, a necesidade de que o novo marco financeiro teña en conta o papel das rexións, aposte por unha xestión descentralizada dos fondos comunitarios e manteña unha política de cohesión forte no continente. Rueda, como presidente da delegación española no Comité Europeo das Rexións, mantivo unha reunión co resto de representantes nacionais e a presidenta do organismo, Kata Tüttő, co fin de fixar 'unha postura común'. Nela, lembrou as demandas de España cara o novo modelo de financiamento, que xa foron recollidas na Declaración de Galicia aprobada en outubro.
