viernes, 16 de enero de 2026
Con respecto ao número de persoas usuarias acadadas en 2025, 287.235 destes carnés pertencen á Biblioteca de Galicia e á de Ánxel Casal, en Santiago de Compostela; á Miguel González Garcés, na Coruña; á Pública de Lugo; á de Nós, en Ourense e a de Antonio Odriozola e Juan Compañel, en Pontevedra e Vigo, respectivamente. Mentres, os 2.648 restantes son dos que fan uso da rede de bibliotecas móbiles da Xunta, A furgoteca, que facilita o acceso á lectura, á información e á aprendizaxe en 20 concellos das provincias de Lugo e Ourense, de menos de 20.000 habitantes, que non contaban con este servizo.
Programación para o Día das persoas usuarias
En canto aos festexos polo Día das persoas usuarias, a Biblioteca de Galicia, situada na Cidade da Cultura de Santiago de Compostela, ten previsto o vindeiro luns, día 12, sábado, unha visita guiada ás 12,00 horas para dar a coñecer as súas instalacións e coleccións e amosará os espazos de acceso restrinxido, onde se custodian a maior parte dos seus fondos. Poderase participar previa reserva no enderezo electrónico bibliotecadegalicia@xunta.gal. Ademais, os que se acheguen recibirán un paquete de libros de agasallo.
Na mesma cidade, a Biblioteca Pública de Santiago Ánxel Casal ofrecerá mañá, sábado, o espectáculo musical e familiar Ecoralia, a lambona ecolóxica, de Pakolas, con entrada libre e de balde ata completar capacidade. Súmaselle a esta programación o Préstamo a cegas, no que cada persoa usuaria escolle unha bolsa de agasallo, cuxo contido só se descubrirá ao abrila.
Pola súa banda, na cidade da Coruña, a Biblioteca Pública Miguel González Garcés fará un recoñecemento aos seus súper lectores e lectoras, en diferentes tramos de idade, aos que lles dará a coñecer o vindeiro luns, día 12, esta distinción. No entanto, poderán ir recollela, xunto cun lote de libros de regalo, ao longo de todo o mes.
Pola contra, en Lugo, a Biblioteca Pública adiantará os festexos a mañá, sábado, e farao agasallando libros aos tres usuarios infantís e os tres adultos con máis préstamos durante o ano 2025.
De igual xeito, a Biblioteca Pública de Ourense Nós tamén celebrará o Día das persoas usuarias este mesmo sábado. A programación dará comezo, ás 11,30 horas, cando se lle outorgue os respectivos agasallos aos lectores e lectoras que máis préstamos realizaron ao longo do pasado ano. A continuación, ás 12 horas, ofrecerase un encontro coas persoas voluntarias da biblioteca, a modo de recoñecemento do seu labor altruísta e colaboración sempre desinteresada.
En Pontevedra, a Biblioteca Pública Antonio Odriozola tamén festexará esta data mañá, ás 10,30 horas, cunha actividade de dinamización teatral, expresión corporal e xogo, dirixido á cativada de entre 4 e seis anos. A actividade é de balde, pero é precisa a inscrición previa no seu enderezo electrónico, biblio.publica.pontevedra@xunta.gal. A continuación, ás 12 horas, levara a cabo o nomeamento dos socios e socias de honra, aos que se lle agasallará cun lote de libros
Pola súa banda, a Biblioteca Pública de Vigo Juan Compañel súmase a este festexo o vindeiro luns, día 12, programando dúas quendas de visitas guiadas, ás 12,00 e ás 18,00 horas. Esta actividade é de balde, pero é precisa a inscrición no seu enderezo electrónico, biblio.publica.vigo@xunta.gal. Completará esta programación o sorteo de libros entre as persoas usuarias que fagan uso dos seus servizos durante esa xornada e o nomeamento de socios de honra ás seis persoas con máis préstamos durante o 2025
A Furgoteca
Finalmente, o servizo de A Furgoteca tamén se sumará a esta celebración con reparto da publicación Cousas que escribín para ti e tamén facendo partícipes as súas persoas usuarias dunha enquisa, que lles vai permitir coñecer o seu perfil, co obxecto de axustar tamén este servizo ás súas inquedanzas e gustos lectores.
A conselleira do Medio Rural, María José Gómez, acompañada do delegado territorial da Xunta en Lugo, Javier Arias, mantivo este mediodía unha reunión con representantes das asociacións Agromuralla e Gandeiros Galegos da Suprema. Esta xuntanza enmárcase nos contactos permanentes que se veñen establecendo cos produtores da nosa comunidade e súmase ás mantidas con anterioridade, como a de onte en Ourense ou a do pasado 5 de xaneiro, co fin de coñecer as súas demandas e defender os seus intereses ante o novo acordo entre a Unión Europea e Mercosur. Seguindo esta liña, mañá venres está convocado o Consello Agrario.
A Consellería de Sanidade vén de publicar, na súa páxina web, o informe de actividade das infeccións respiratorias agudas correspondente á semana dúas do ano, que rematou o 11 deste mes, no que se sinala que a actividade gripal en Galicia rexistra unha intensidade baixa con tendencia decrecente. Respecto da semana anterior, a taxa de consultas por gripe descendeu un 4 % e fica en 72,7 consultas por 100.000 habitantes. Con todo, só se observou unha diminución da taxa de consultas no grupo de 20 a 59 anos, do 7,8 %. No caso do grupo de 5 a 19 anos rexistrouse unha suba do 13,9 %. O grupo coa maior taxa de consultas continúa a ser o de 0 a 4 anos, con 99,3 consultas por 100.000 habitantes.
