viernes, 16 de enero de 2026
A iniciativa inscríbese nas políticas da Xunta para reforzar a excelencia universitaria, promover a innovación docente e aliñar a oferta formativa coas tendencias internacionais, contribuíndo así a elevar os estándares de calidade e a visibilidade das universidades galegas a nivel nacional e europeo.
Incorporación de novos graos de excelencia
No caso do Selo de Grao de Excelencia, poden optar a el seis titulacións impartidas de xeito ininterrompido desde o curso 2020/21. Cada universidade pode presentar un máximo de dúas solicitudes, tanto para graos impartidos en exclusiva como para titulacións conxuntas nas que actúe como universidade coordinadora. Actualmente, dispoñen deste recoñecemento tres títulos na primeira e única convocatoria celebrada anteriormente.
As candidaturas serán avaliadas cun máximo de 100 puntos, distribuídos en oito bloques de criterios. Para obter o selo, é necesario acadar 90 puntos ou máis. Os aspectos avaliados son os seguintes: estratexia e resultados (25 puntos), inserción laboral (20), calidade da proposta presentada (15), currículo (10), deseño do proceso de ensino-aprendizaxe (10), profesorado (10), avaliación (10) e internacionalización (10).
O Selo de Grao de Excelencia ten unha vixencia de seis cursos académicos, con seguimentos anuais e posibilidade de renovación. A concesión, ademais do recoñecemento, supón un financiamento extraordinario, cunha dotación de 60.000 euros anuais, o que supón un investimento total de 360.000 euros ao longo do período. As titulacións que obtiveron este selo na pasada convocatoria, a primeira realizada, foron os graos en Enxeñaría Informática e Fisioterapia da Universidade da Coruña e o grao en Veterinaria da Universidade de Santiago de Compostela, no campus de Lugo.
Renovación da mención de máster de excelencia
No caso dos másteres universitarios, a Consellería de Educación ten aberto o prazo para a renovación da mención de excelencia concedida no curso 20/21, cuxa vixencia remata o 31 de agosto de 2026. As titulacións que poden participar nesta convocatoria son os máster de Bioinformática para Ciencias da Saúde da Universidade da Coruña, o máster en Tradución para a Comunicación Internacional da Universidade de Vigo e o máster de Biotecnoloxía Avanzada impartido pola Universidade de Vigo e a da Coruña.
As universidades deben presentar ata o 28 de febreiro, de forma electrónica, a correspondente solicitude de renovación, acompañada dunha memoria de autoavaliación e dun plan de mellora, de acordo cos requisitos establecidos na normativa vixente.
Actualmente, dispoñen deste selo un total de 14 másteres das tres universidades públicas galegas, concedidos nas diferentes convocatorias celebradas nos últimos anos.
A conselleira do Medio Rural, María José Gómez, acompañada do delegado territorial da Xunta en Lugo, Javier Arias, mantivo este mediodía unha reunión con representantes das asociacións Agromuralla e Gandeiros Galegos da Suprema. Esta xuntanza enmárcase nos contactos permanentes que se veñen establecendo cos produtores da nosa comunidade e súmase ás mantidas con anterioridade, como a de onte en Ourense ou a do pasado 5 de xaneiro, co fin de coñecer as súas demandas e defender os seus intereses ante o novo acordo entre a Unión Europea e Mercosur. Seguindo esta liña, mañá venres está convocado o Consello Agrario.
A Consellería de Sanidade vén de publicar, na súa páxina web, o informe de actividade das infeccións respiratorias agudas correspondente á semana dúas do ano, que rematou o 11 deste mes, no que se sinala que a actividade gripal en Galicia rexistra unha intensidade baixa con tendencia decrecente. Respecto da semana anterior, a taxa de consultas por gripe descendeu un 4 % e fica en 72,7 consultas por 100.000 habitantes. Con todo, só se observou unha diminución da taxa de consultas no grupo de 20 a 59 anos, do 7,8 %. No caso do grupo de 5 a 19 anos rexistrouse unha suba do 13,9 %. O grupo coa maior taxa de consultas continúa a ser o de 0 a 4 anos, con 99,3 consultas por 100.000 habitantes.
