sábado, 7 de noviembre de 2026
O estudo baséase en microdatos da Enquisa Estrutural a Fogares do Instituto Galego de Estatística (IGE) e na clasificación do grao de urbanización aliñada coa metodoloxía de Eurostat.
Máis fogares con ordenador e dispositivos
Nos últimos anos, o equipamento informático nos fogares rurais de Galicia experimentou un crecemento notable. Segundo os datos do informe, a presenza de ordenador xa sexa fixo ou portátil e doutros dispositivos como tablets é cada vez máis habitual, achegándose aos niveis das áreas urbanas. Esta tendencia confirma que a dixitalización avanza no rural, aínda que con diferenzas internas que cómpre ter en conta.
A conectividade consolídase
En 2024, a contratación de internet e banda larga no rural galego consolídase como un servizo esencial, alcanzando cifras históricas. Por primeira vez, supera o 91% (91,9%). Este avance achega o rural á media galega, situada no 95,5%, reducindo de forma notable a fenda coa contorna urbana. Ademais, nos fogares con tres ou máis persoas a contratación supera o 98%, mentres que nos fogares unipersoais baixa ata o 78,5%, o que evidencia que a conectividade é xa maioritaria e segue a medrar con forza.
Mocidade galega: liderado en comercio electrónico e e-administración
O uso de internet no rural galego continúa medrando e consolídase como unha práctica habitual na maioría dos fogares. Non se detecta fenda de xénero: a porcentaxe é practicamente idéntica entre homes e mulleres, incluso lixeiramente superior no caso das mulleres (90,6% das mulleres do rural son internautas). As principais diferenzas aparecen coa idade. Entre os 16 e os 44 anos, case todas as persoas do rural declaran usar internet (por riba do 99%), e no tramo de 45 a 54 anos a cifra mantense moi alta, cun 97,2%. A partir dos 55 anos, a porcentaxe baixa ata o 89,7%, e no grupo de 65 a 74 anos sitúase no 63,6%, o que confirma que a idade segue a ser o factor máis determinante no acceso e uso da rede.
O 56,2% das persoas do rural compran por internet, ao subir 3,5 puntos no último ano. Por debaixo dos 45 anos xa compra por internet máis do 80% da poboación do rural.
O 82,1% das persoas que viven no rural interactuaron coa administración a través de internet, superando xa o 56% en todos os tramos de idade.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
