miércoles, 5 de noviembre de 2025
Segundo destacou a conselleira de Economía e Industria, María Jesús Lorenzana, durante a tramitación da norma, trátase dunha lei que nos sitúa ao carón das primeiras economías europeas e que permite avanzar na descarbonización, no autoabastecemento e na xeración de emprego e riqueza a longo prazo.
Un modelo que combina industria e protección ambiental
A Lei de recursos naturais establece un marco legal sólido para a protección, conservación, ordenación e aproveitamento sostible dos recursos galegos -como o vento, a auga, o solo ou os minerais-, promovendo un modelo no que o desenvolvemento industrial e a protección ambiental non son obxectivos opostos, senón complementarios.
O texto legal facilita ferramentas para que administracións e empresas poidan colaborar nun uso racional dos recursos, fomentando a innovación e a corresponsabilidade. Entre as medidas destacadas figuran:
- a integración da avaliación social e económica dos proxectos dentro da súa avaliación ambiental;
- a creación dun sistema de indicadores de impacto socioeconómico;
- a exixencia dun estudo de impacto social e económico previo á autorización dos proxectos;
- e a participación da Administración autonómica en iniciativas estratéxicas a través da Sociedade Recursos de Galicia (RDG).
A norma tamén introduce instrumentos pioneiros como un canon á eólica mariña, un fondo para a recuperación de zonas afectadas por incendios e a regulación dun mercado voluntario de créditos de carbono que permitirá monetizar a captación de carbono de determinadas actividades.
Beneficios sociais e industriais xa visibles
A Lei permitirá abaratar a factura eléctrica a familias e empresas galegas e impulsar o autoconsumo nas áreas empresariais, reducindo a dependencia enerxética exterior, así como favorecerá a creación de emprego no sector renovable.
Cabe destacar tamén o papel desta norma no impulso de proxectos de repotenciación eólica, que contribúen a incrementar a xeración eléctrica reducindo o impacto na paisaxe e fomentando a industria asociada á reciclaxe e reutilización de equipos.
Galicia, referente europeo en sustentabilidade e innovación
Esta lei é unha oportunidade para transformar Galicia nun modelo europeo de equilibrio entre desenvolvemento e sustentabilidade, reforzando a imaxe da comunidade como territorio innovador, responsable e comprometido coa protección da súa riqueza natural.
Galicia non ten que elixir entre industria e natureza: elixe futuro, resume Lorenzana, quen destaca que o obxectivo final é xerar emprego, riqueza e benestar, sempre desde o máximo respecto ambiental e coa participación activa das comunidades locais.
O cinema arxentino volve ser protagonista da programación da Filmoteca de Galicia, que este mes recibirá as cineastas María Aparicio e Lucía Seles con motivo das retrospectivas que lles dedica. Tamén visitará a sede da cinemateca da Xunta na Coruña o director do Buenos Aires Festival Internacional de Cine Independiente, Javier Porta Fouz, para presentar unha copia restaurada de Nueve reinas, ademais de coñecidos nomes do noso audiovisual nas novas entregas da sección Off Galicia, do ciclo Espello Video Cine e da sesión inaugural do 20º aniversario do programa educativo Cinema en Curso. A nova carteleira mensual inclúe, así mesmo, varias proxeccións do Cormorán Film Fest, as últimas de Centenario Maurice Pialat e as películas que cada ano selecciona a Asociación Amigos da Ópera coincidindo coa súa Temporada Lírica, entre outras citas.
O presidente da Xunta, Alfonso Rueda, informou de que o Consello da Xunta aprobou hoxe a sinatura do convenio do nivel acordado para 2025 entre a Consellería de Política Social e Igualdade e o Instituto de Maiores e Servizos Sociais (Imserso) destinado ao sistema de atención á dependencia das comunidades autónomas e que, no caso de Galicia, ascende a 105 millóns de euros sufragados entre o Estado e a Xunta, só tres máis que os asignados o exercicio pasado. Tal e como informou Rueda, Galicia recibirá algo máis de 52 millóns de euros, grazas a que a Xunta cumpre con éxito os obxectivos recollidos neste acordo: diminución da lista de agarda, mellora na calidade dos servizos, etc.
