domingo, 11 de octubre de 2026
O director da Axencia Galega da Calidade Alimentaria da Consellería do Medio Rural, Martín Alemparte, presidiu hoxe a reunión na que quedou constituído o Consello Galego de Artesanía Alimentaria, un órgano consultivo que ten como obxectivo mellorar a calidade e a promoción das producións da nosa comunidade autónoma.
O encontro, no que tamén estiveron presentes os directores xerais de Gandaría, Agricultura e Industrias Agroalimentarias, José Balseiros; de Comercio e Consumo; Gabriel Alén; e de Pesca, Acuicultura e Innovación Tecnolóxica, Cándido Rial; serviu para poñer en marcha este órgano no que están representados distintos departamentos da Xunta, así como as organizacións profesionais agrarias, o sector cooperativo, consellos reguladores e asociacións de artesáns alimentarios.
Na sesión abordáronse cuestións como a presentación da normativa reguladora, a análise da situación actual do Rexistro da Artesanía Alimentaria, a difusión do catálogo de empresas operadoras, as accións desenvolvidas en materia de promoción do distintivo de calidade Artesanía Alimentaria de Galicia, a captación de novos operadores e o control da actividade.
Excelencia das producións
Durante a súa intervención, Alemparte destacou que a artesanía alimentaria é unha forma de producir e de elaborar, pero tamén debe avanzar cara á excelencia e á calidade final das producións. Neste sentido, engadiu que é preciso elaboralas cada vez mellor e con máis coidado e respecto polo produto.
O director da Axencia subliñou ademais a importancia de protexer o termo artesán, evitando o seu uso fraudulento en produtos que non respectan a normativa nin están rexistrados. Defender o que é auténtico é unha responsabilidade colectiva, e este Consello nace precisamente para iso: para traballar xuntos na promoción, no control e no impulso da artesanía alimentaria galega, indicou.
Alemparte concluíu sinalando que a mellor maneira de defender Galicia é seguir facendo ben o que mellor sabemos facer: produtos auténticos, de calidade e con alma galega.
136 operadores inscritos das catro provincias galegas
Cómpre salientar que actualmente están inscritos en Artesanía Alimentaria un total de 136 operadores das catro provincias galegas, dos cales 47 son da Coruña, 43 de Lugo, 21 de Ourense e 25 de Pontevedra. Todos eles pertencen aos diferentes grupos de produción regulados mediante norma técnica, como panadaría e confeitaría, derivados lácteos, conservas vexetais, mel, cervexa, aceites, licores ou marmeladas, entre outros.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
