domingo, 19 de abril de 2026
Cinema e activismo
A Sala José Sellier é xa desde hoxe unha das principais pantallas de Intersección e, en colaboración con esta mostra, organiza do 3 ao 23 de outubro a retrospectiva do realizador Travis Wilkerson, quen presentará persoalmente as proxeccións dos días 3 e 4 de outubro. O ciclo é unha oportunidade única para achegarse á obra dun autor cuxo traballo transcende os límites do documental, a ficción, a interpretación e o activismo, cun estilo austero nos medios e firme nos principios, cualificado pola prensa como a conciencia política do cinema estadounidense.
A súa filmografía, recoñecida internacionalmente en festivais como Berlín, Sundance, Toronto ou Locarno, aborda temas tan diversos como a memoria histórica, as desigualdades, o poder das narrativas oficiais e as fronteiras da identidade. Varios dos traballos que se presentan na Coruña están codirixidos xunto á súa parella, Erin Wilkerson, como Did You Wonder Who Fired the Gun? ou a serie de curtas programadas o sábado 4.
Percorrido polas obras máis destacadas de Maurice Pialat
A cinemateca da Xunta continúa co ciclo Centenario Maurice Pialat, unha retrospectiva que conmemora os cen anos do seu nacemento. Esta segunda entrega aborda a etapa máis recoñecida da súa traxectoria, coa proxección de filmes esenciais como A nuestros amores, retrato descarnado da adolescencia que lle valeu o aplauso da crítica; Bajo el sol de Satán, controvertida Palma de Ouro en Cannes en 1987, ou Van Gogh, unha aproximación radical e humanísima aos últimos días do pintor, considerada unha das mellores representacións do artista na pantalla.
O ciclo culminará en novembro coa proxección de La maison des bois, a súa única incursión televisiva. Ambientada na Primeira Guerra Mundial, esta serie de sete episodios amosa un Pialat máis intimista e, malia a súa escasa difusión, é hoxe unha obra de culto imprescindible para comprender o seu universo creativo.
Fondos depositados na Filmoteca
Ademais, a Filmoteca de Galicia inaugura en outubro o ciclo Espello, Vídeo, Cine: unha crónica da Galicia dos oitenta, que do 9 de outubro ao 20 de decembro revisitará unha época clave da nosa historia recente a través das imaxes filmadas nesa década polas cámaras pioneiras da produtora coruñesa liderada por Xosé Xoán Cabanas Cao. A cinemateca dedicaralle catro sesións a este fondo, depositado no seu arquivo e recentemente dixitalizado a partir dos orixinais en U-Matic, que constitúe un dos testemuños audiovisuais máis valiosos da vida política, social e cultural da Galicia previa á TVG. As dúas primeiras sesións, os días 9 e 11 de outubro, contarán con especialistas e protagonistas daquel tempo.
Pola súa banda, o 20 de outubro comezarán as proxeccións do festival Animacción, entre as que destacan The Tower, que conta as vivencias dunha nena palestina nun campo de refuxiados; The Wanted 18, un documental animado palestino-canadense; Memorias dun caracol e Flow, gañadora do Oscar a mellor filme de animación.
Ademais, no apartado Fóra de Serie volve exhibirse La viajera, de HongSang-soo, o día 7, mentres que o 24 será a quenda de Danza no foco, de Marghe Morello, un repaso polo panorama da danza contemporánea galega a través de 10 cápsulas visuais. Por último, a Filmoteca acollerá o 21 de outubro a conferencia perfomativa Cine cego, a cargo da creadora e teórica Marta Azparren, acompañada pola artista sonora Haize Lizarazu.
O FIV de Vilalba volverá reunir na localidade lucense unha programación destacada da escena independente e alternativa estatal, cun cartel no que figuran nomes como Carlos Ares, Alcalá Norte, La M.O.D.A. e Ángel Stanich, xunto a outras propostas moi presentes no panorama actual como Repion, Puño Dragón, Celia Becks, Futuro Alcalde, Grande Osso e Rapariga DJ. A boa resposta do público nas últimas semanas confirma, ademais, a gran acollida desta edición, coa previsión de que Vilalba volva encherse de ambiente festivalero a próxima fin de semana. A programación do FIV de Vilalba desenvolverase entre o Escenario Vibra Mahou, o Escenario #Fiver by Lactalis e a Zona DJ, consolidando un formato que combina os grandes concertos nocturnos coa actividade diúrna do sábado.
Galicia sitúase como a comunidade autónoma con menor porcentaxe de pacientes que agardan máis de 60 días por unha consulta co especialista. Así o referendan os datos publicados polo Ministerio de Sanidade sobre listas de espera no Sistema Nacional de Saúde a peche de 2025. Segundo os datos, en decembro de 2025 a comunidade galega situouse como a cuarta rexión española con mellores tempos medios de espera no ámbito das primeiras consultas. Neste eido, o Servizo Galego de Saúde rexistrou unha media de 63 días de espera, fronte aos 102 do Sistema Nacional de Saúde. Estas cifras reflicten que os galegos esperan 39 días menos para acceder a unha consulta co especialista que a media dos españois.
