sábado, 7 de noviembre de 2026
Preto do 94% dos galegos e galegas empregaron internet nos últimos tres meses en 2024. O uso da rede é practicamente universal nas franxas de idade dos 16 aos 44 anos, supera o 98% entre os 45 e os 54 anos e segue crecendo entre os 55 e os 64 anos, onde acada o 93,2% e, entre os 65 e o 74, rozando o 75%. Cómpre destacar que Galicia incrementou os usuarios activos de Internet nun 5% dende o ano 2021, fronte ao 2% do conxunto de España e o 4,3% da Unión Europea.
Ademais do incremento de fogares con internet contratado, o estudo sinala un aumento significativo na contratación de conexións de alta velocidade: o 65,2% dos fogares conta con conexións superiores aos 100 Mbps, fronte ao 30% de 2021; e un 86,3% dos fogares dispón de internet de máis de 30Mbps.
Dispositivos dixitais e uso
O dispositivo electrónico máis estendido entre os galegos é o teléfono móbil con capacidade de acceso a Internet (smartphone). O 95,7% da poboación galega emprega un smartphone. O seu uso é universal nas persoas de 16 a 44 anos, mentres que entre as persoas maiores de 65 anos sitúase no 83,4%.
O 80,7% dos fogares dispoñen dun ordenador de sobremesa, portátil ou tablet, destacando o portátil como tipo de ordenador máis común (60,8%). As televisións intelixentes xa están presentes no 59,1% das vivendas, o que supón un incremento do 6,7% respecto a 2023 e dun 35,2% desde 2021. Tamén aumenta a presenza de altofalantes dixitais nos fogares, que xa se sitúa no 16,5%, un 6,5% máis que o ano anterior.
As actividades dixitais máis frecuentes inclúen a busca de información sobre bens e servizos (92,6%), as videoconferencias (92,6%), a lectura de noticias en liña (85,5%) e o uso da banca electrónica (81,6%).
Compras, administración electrónica e ciberseguridade
O 67,4% da poboación galega mercou por Internet en 2024, cun incremento do 5,5% no último ano. O uso da administración electrónica en Galicia tamén continúa medrando e xa a empregan o 86,6% dos internautas. En canto á ciberseguridade, o 17% dos galegos declarou ter sufrido algún incidente no último ano.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
