lunes, 7 de septiembre de 2026
A delegada territorial da Xunta de Galicia en Vigo, Ana Ortiz, e o director de Turismo de Galicia, Xosé Merelles, anunciaron unha nova actuación en Vigo dentro da programación dos Concertos do Xacobeo. Trátase de Al Di Meola, o xenial guitarrista e compositor norteamericano, que saltará ao escenario do Teatro Afundación da cidade o vindeiro 16 de novembro dentro do cartel do Gozo Festival.
Hoxe podemos anunciar unha nova actuación que conta co apoio da Xunta de Galicia e que se une a outros eventos xa programados na nosa cidade como o Galicia Fest, os concertos de Iván Ferreiro, Anastacia e festivais coma One Dance Festival, Vigo Porté e o espectáculo Carmina Burana de La Fura dels Bauls, destacou Ana Ortiz.
Pola súa banda, Xosé Merelles incidiu na repercusión social e económica que aportan este tipo de eventos musicais enmarcados nos Concertos do Xacobeo. Xeran gasto e riqueza cultural e convértense nun activo da cidade para atraer a públicos curiosos de diferentes puntos de España, apuntou.
Xunto á delegada da Xunta e ao director de Turismo de Galicia, tamén participou na presentación o director de Sweet Nocturna, David Lago, que definiu a Al Di Meola como un dos grandes guitarristas do noso tempo, cun currículo ao alcance de poucos, e cunha exitosa traxectoria que abarca xa máis de catro décadas.
Máis de seis millóns de discos vendidos
O músico norteamericano acumula, entre outros logros, catro discos de ouro, dous de platino e máis de seis millóns de discos vendidos en todo o mundo. A lista de recoñecementos que recibiu ao longo dos anos é tamén extensa: entre outros, un doutor Honoris Causa do prestixioso Berklee College of Music, o Premio Honorífico Miles Davis outorgado polo Festival de Jazz de Montreal, un Premio á Traxectoria da BBC outorgado por sir George Martin en 2008 ou numerosos nomeamentos e premios Grammy.
Al Di Meola, un auténtico xenio da guitarra e un prolífico compositor, acumula máis de 30 álbums como líder, ademais de moitos outros onde participou, con figuras como o supergrupo de fusión Return to Forever (con Chick Corea, Stanley Clarke e Lenny White), o célebre Guitar Trio (con John McLaughlin e o seu admirado Paco de Lucía), ou o trío Rite of Strings (co baixista Clarke e o violinista Jean-Luc Ponty).
O músico de New Jersey colaborou tamén con artistas como Luciano Pavarotti; estrelas do pop como Paul simon, Stevie Wonder ou Phil Collins; referentes do rock como Jimmy Page, Steve Vai, Carlos Santana ou Frank Zappa; ou grandes músicos de jazz como Herbie Hancok ou Les Paul. Pioneiro na fusión de músicas do mundo e jazz, continuou explorando ao longo da súa carreira a rica influencia do flamenco, o tango, a música de Medio Oriente, brasileira ou africana.
Concertos do Xacobeo: un programa plural
A Xunta de Galicia continúa firme na súa aposta por posicionar á comunidade galega como destino turístico de grandes eventos musicais a través dos Concertos do Xacobeo, un programa amplo e plural impulsado pola Xunta que da cobertura a todas as grandes citas e espectáculos musicais en 2025, como o Gozo Festival, O Son do Camiño, o Morriña Fest, o novo Festival Jaleo!, o PortAmérica, o Resurrection, o Caudal Fest, o Río Verbena, o Orballo Cultural e máis dun centenar de festivais, ciclos e concertos imprescindibles en máis de 50 localidades de toda Galicia.
Máis de 700 artistas internacionais, nacionais e galegos de todos os xéneros que pisan forte nas listas de escoitas de agora e de sempre visitarán neste 2025 os Concertos do Xacobeo. A aposta pola calidade e a diversidade de gustos e estilos para diferentes xeracións de públicos constitúe un atractivo único programa, que un ano máis propón 12 meses de música en directo, favorecendo o turismo e a oferta cultural de xeito deslocalizado ao longo de todo o ano.
A exposición 'As estacións do ano na arte galega dos séculos XX e XXI' pecha as súas portas no Museo Centro Gaiás o domingo 6 de setembro con máis de 36.000 visitas desde a súa inauguración. Concibido e comisariado pola artista e investigadora Mónica Alonso, o proxecto destaca polo seu deseño innovador, que constrúe un percorrido sensorial para mergullarse na arte contemporánea. Máis de 80 obras de 63 artistas dan forma a un itinerario que transita polas paisaxes, símbolos e lembranzas asociadas ao paso do tempo e os cambios entre a primavera, o verán, o outono e o inverno en Galicia.
Galicia continúa a manter o liderado na taxa de escolarización 0-3 por cuarto curso consecutivo, cun 64 %. Os datos do Ministerio de Educación, Formación Profesional e Deportes referentes ao período lectivo 2026-2026 consolidan este primeiro posto, con 14 puntos por riba da media nacional. Ademais, Galicia é a única comunidade autónoma que está por encima da barreira do 60 % en niveis de escolarización no primeiro ciclo de Educación Infantil e supera en case 20 puntos o obxectivo da Unión Europea para o ano 2030, que é do 45 %. Estas cifras colocan a Galicia como referente no apoio ás familias e á infancia e son posibles grazas a medidas como a gratuidade das escolas infantís.
