lunes, 7 de septiembre de 2026
A Xunta, a través da Dirección Xeral de Saúde Pública da Consellería de Sanidade, lembra os principais consellos que debe seguir a poboación ante a suba das temperaturas previstas para esta semana en toda Galicia.
Desde a xornada de hoxe e ata o vindeiro sábado, a comunidade experimentará unha importante suba de temperaturas polo que o departamento sanitario da Xunta traslada unha recomendacións que se centran, fundamentalmente, na alimentación e na exposición ao sol.
A Consellería de Sanidade, aconsella beber máis líquido do habitual sen esperar a ter sede, sobre todo auga e zumes de froita lixeiramente fríos. Así mesmo, débese evitar inxerir bebidas quentes, alcohólicas, café, té e bebidas moi azucradas. Pola súa banda, e no que atinxe á alimentación débese priorizar comer verduras e froitas, evitando as comidas copiosas.
Respecto da vestimenta, recoméndase empregar roupa de tecidos naturais, lixeira e folgada, de cores claras, sombreiros, lentes de sol e cremas protectoras solares. O calzado deberá ser cómodo, fresco e que transpire.
No interior dos edificios permanecerase, a ser posible, en espazos ventilados ou acondicionados, utilizando as habitacións máis frescas da vivenda. Durante o día, aconséllase baixar as persianas e pechar as xanelas, abríndoas pola noite para ventilar. Así mesmo, poderán utilizarse ventiladores. Nos momentos de calor máis intensa pódese refrescar o corpo cunha ducha ou cun baño en auga morna. Ademais, procurarase eludir as aglomeracións de persoas en locais sen aire acondicionado.
No exterior dos edificios débense evitar, na medida do posible, as actividades nas horas máis calorosas, reducir a actividade física, procurar buscar as sombras e, cando se estacione o coche, non se deberá deixar no interior nin a nenos nin a persoas maiores nin a ningún animal de compaña.
Así mesmo, convén non ir á praia nas horas de máxima calor, no mediodía e nas primeiras da tarde. Ademais nunca se debe quedar durmido tomando o sol. Respecto das cremas de protección, débense utilizar as de maior protección posible e nunca inferior a factor 15.
Lémbrase tamén que, no caso de ter parentes ou veciños que vivan sós, é conveniente facerlles un seguimento especial estes días, co fin de comprobar que toman as medidas recomendadas e o seu estado de saúde é o habitual.
A exposición a temperaturas excesivas pode provocar problemas de saúde como mareo, cansazo, debilidade, fatiga e cambras musculares, síncope, deshidratación, insolación e golpe de calor. A maioría das enfermidades asociadas á calor son consecuencia máis ou menos grave dun fallo no sistema de termorregulación.
Avisos por calor
Aínda que non se espera que haxa alertas por episodios de calor, porque está previsto que as temperaturas baixen ás noites, desde Meteogalicia organismo dependente da Consellería de Medio Ambiente e Cambio Climático facilítase a toda a poboación a información sobre avisos meteorolóxicos.
Galicia atoparase entre os días 28 e 31 de maio na influencia dun anticiclón que se localizará ao norte da península Ibérica e que achegará aire cálido procedente do sur da península Ibérica e do norte de África.
Con estas condicións, as temperaturas irán en ascenso, sendo os días máis calorosos o xoves 29 e o venres 30, cando se poden superar facilmente os 30ºC en moitas comarcas e localmente mesmo os 35ºC en áreas de val da provincia de Ourense. Esta situación comezaría a remitir nalgúns puntos o propio venres 30 pola tarde pola presenza dalgunhas tormentas.
O sábado 31 as temperaturas seguirían sendo elevadas para a época do ano, pero cun descenso con respecto ás que se rexistrarían o xoves ou o venres. E xa o domingo 1 de xuño remitiría definitivamente a situación coa chegada dunha masa de aire atlántico máis fresca e húmida, que substituiría ao aire cálido de días anteriores.
A exposición 'As estacións do ano na arte galega dos séculos XX e XXI' pecha as súas portas no Museo Centro Gaiás o domingo 6 de setembro con máis de 36.000 visitas desde a súa inauguración. Concibido e comisariado pola artista e investigadora Mónica Alonso, o proxecto destaca polo seu deseño innovador, que constrúe un percorrido sensorial para mergullarse na arte contemporánea. Máis de 80 obras de 63 artistas dan forma a un itinerario que transita polas paisaxes, símbolos e lembranzas asociadas ao paso do tempo e os cambios entre a primavera, o verán, o outono e o inverno en Galicia.
Galicia continúa a manter o liderado na taxa de escolarización 0-3 por cuarto curso consecutivo, cun 64 %. Os datos do Ministerio de Educación, Formación Profesional e Deportes referentes ao período lectivo 2026-2026 consolidan este primeiro posto, con 14 puntos por riba da media nacional. Ademais, Galicia é a única comunidade autónoma que está por encima da barreira do 60 % en niveis de escolarización no primeiro ciclo de Educación Infantil e supera en case 20 puntos o obxectivo da Unión Europea para o ano 2030, que é do 45 %. Estas cifras colocan a Galicia como referente no apoio ás familias e á infancia e son posibles grazas a medidas como a gratuidade das escolas infantís.
