martes, 1 de julio de 2025
Nesta liña, Rueda incidiu na necesidade 'da integración física da Policía Nacional e da Garda Civil nas instalacións do 112 para unha mellor coordinación na xestión das emerxencias', tal e como vén demandando a Xunta, e da interconexión dos equipos de comunicación dos corpos e forzas de seguridade con rede de comunicacións de emerxencias de Galicia Resgal.
Outra das melloras que se propón solicitarlle ao Estado é a recuperación da presenza da Unidade Militar de Emerxencias en Galicia, cun grupo estable na base da Brilat en Pontevedra.
Pola súa banda, o Goberno galego aposta tamén por mellorar os sistemas de comunicación nas instalacións do CIAE 112 con conexións por satélite, a instalación dunha matriz Tetra e conexión directa coa centraliña do 061. A maiores, proponse mellorar a autonomía enerxética e os sistemas de comunicación da rede Resgal para asegurar o seu funcionamento en caso dun apagamento.
Protocolos de actuación nos eidos escolar e social
No ámbito escolar, a Xunta de Galicia vai contar cun protocolo de actuación fronte a alertas e emerxencias, cuxa posta en marcha deriva da experiencia vivida neste apagamento. Este documento, que se axustará aos niveis e fases de emerxencias establecidos na normativa xeral, será a folla de ruta do sistema educativo a partir de agora para casos de alerta ou emerxencia, agás alertas meteorolóxicas, para o cal xa existe un protocolo específico.
Con carácter xeral, e salvo indicación expresa do contrario, o presidente da Xunta afirmou que os centros permanecerán abertos aínda que non haxa actividade lectiva para facilitar a conciliación das familias. Do mesmo xeito, todo o persoal docente e non docente deberá acudir ao seu posto de traballo no horario habitual, sempre que poida facelo en condicións de seguridade. O alumnado que acuda ao centro será atendido, pero non se poderán realizar actividades que impliquen avance nos contidos curriculares ou probas de avaliación.
Desde a Consellería de Política Social e Igualdade detectouse a necesidade de proceder á revisión e valoración de todos os grupos electróxenos das residencias de maiores e centros de atención á discapacidade, co obxectivo de comprobar a súa potencia de cara ao mantemento dos servizos básicos dos centros durante posibles situacións de emerxencia. Paralelamente, considérase necesario comprobar que os depósitos de combustible destes grupos electróxenos dispoñen de capacidade suficiente.
Ademais, valórase a posibilidade de realizar un protocolo básico de actuación en todas as residencias públicas en que se determine o xeito de proceder con respecto aos sistemas de apoio de enerxía, das comunicacións para realizar e de actuación no caso de darse algunha situación de emerxencia ou prolongarse a situación de perda de enerxía eléctrica do sistema.
Reforzo de comunicacións no eido sanitario e económico
No que se refire ao eido sanitario, Rueda afirmou que malia a que a asistencia estivo garantida en todo momento, desde a Xunta apostarase por reforzar os sistemas de alimentación interrompida dos centros de procesamento de datos do Servizo Galego de Saúde e sistemas de apoio, así como as redes de comunicación alternativas á dos operadores e obrigar as empresas que prestan servizos críticos a dispoñer tamén dunha segunda vía de comunicación para salvagardar o normal funcionamento das comunicacións.
Nesta mesma liña, poñerase en marcha un protocolo especifico para garantir a continuidade da atención dos pacientes que dependen de equipos conectados a rede eléctrica nos seus domicilios e se fose preciso garantir o seu traslado aos centros asistenciais. Ademais, proponse triplicar a dotación da Rede Tetra actual nas áreas sanitarias, estendendo a dispoñibilidade de terminais, canto menos, aos equipos directivos e os de tecnoloxía. Outra das propostas de mellora incluídas céntrase na dotación a todos os hospitais e puntos de atención continuada dunha rede satelital de órbita baixa que permita, en caso de perda de conexión das comunicacións de voz e aplicacións críticas, dispoñer dunha rede de continxencia para poderlle dar continuidade aos servizos básicos.
Tamén se quere activar un protocolo de revisión periódica das conexións dos servizos esenciais, ampliar o número de xeradores no ámbito da atención primaria e elaborar un protocolo para garantir a subministración de combustible en situacións de cortes eléctricos.
No que atinxe aos servizos de Emerxencias Sanitarias (061) proponse levar as comunicacións a centrais públicas con xeradores autónomos e despregar de forma inmediata unha rede satelital de órbita baixa. A batería de medidas no eido sanitario complétase cun plan de acción unificado en todas as áreas sanitarias para garantir a continuidade de atención a pacientes con dependencia de equipos médicos conectados á rede eléctrica, minimizando os riscos para a súa saúde en caso de interrupción da subministración eléctrica.
Por outro lado, como medida en conxunto ca Consellería de Economía, o presidente da Xunta indicou que se establecerá un protocolo coas empresas esenciais neste tipo de acontecementos e manterase unha comunicación fluida e estandarizada coas subministradoras de combustible e coas empresas eléctricas para ter coñecemento da evolución e das previsións do restablecemento do servizo.
O presidente da Xunta, Alfonso Rueda, resaltou hoxe que Galicia asumirá desde mañá 'a plena xestión sobre o seu litoral', un 'feito histórico desde o punto de vista do autogoberno' que virá acompañado da posta en marcha de xeito inmediato de dous novos servizos, unha nova canle de información á cidadanía e a posibilidade de unificar nun só formulario calquera trámite ou solicitude sobre o litoral. Deste xeito, o Goberno autonómico prepárase para asumir o autogoberno pleno do litoral co traspaso efectivo a Galicia a partir de mañá das funcións, medios e servizos en materia de ordenación costeira.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
