jueves, 29 de octubre de 2026
A conselleira de Política Social e Igualdade, Fabiola García, asistiu esta mañá no CPI de Vedra a unha das xornadas que forman parte do proxecto educativo O machismo é violencia. Esta iniciativa da Xunta, que está prevista ata o momento en máis de 50 centros de toda Galicia, está dirixida ao alumnado de 3º e 4º de Secundaria e Bacharelato e ten como obxectivo sensibilizar e previr a violencia de xénero mediante a reflexión e a participación activa das mozas e mozos.
Na súa intervención, a conselleira, que estivo acompañada polo director xeral de Loita contra a Violencia de Xénero, Roberto Barba, destacou que con este programa estudantes e docentes teñen acceso a testemuñas reais de mulleres valentes que decidiron alzar a súa voz, algo que considerou fundamental para sensibilizar desde idades moi temperás á mocidade, intervindo de forma activa para poder combater a violencia de xénero. Ao acto tamén asistiron o alcalde de Vedra, Carlos Martínez, e o director do centro, José Viaño.
Fabiola García puxo en valor este proxecto da Xunta, que contribuirá a consolidar as experiencias educativas que comezamos no 25N e que queremos estender ao resto do ano. A conselleira aproveitou para lanzar unha mensaxe á xente nova, instándoos a non normalizar a violencia de xénero en ningunha das súas formas, a manter os ollos abertos e a estar unidos para poder detectar, previr e erradicar a violencia sobre as mulleres.
Os centros educativos interesados en formar parte desta iniciativa poden inscribirse nesta ligazón na que se atopa un formulario básico para anotarse e poderán escoller a data que mellor se adapte ás necesidades do centro para realizar a actividade.
A principal novidade do programa O machismo é violencia é que conta con testemuñas reais de mulleres vítimas de violencia de xénero e que se complementa con persoal especializado para afondar na problemática das masculinidades tóxicas. Este proxecto desenvolvese en dúas fases. En primeiro lugar, proporcionáselles aos centros educativos unha guía didáctica, que serve como recurso preparatorio para que o profesorado poida abordar o tema de maneira autónoma na aula. A guía, deseñada cun enfoque pedagóxico e interactivo, inclúe actividades e contidos adaptados para facilitar a comprensión e implicación do alumnado.
Na segunda fase, levase a cabo unha intervención presencial nos centros estruturada en tres accións. A primeira delas consiste no testemuño dunha muller que superou situacións de violencia de xénero e que compartirá cos estudantes a súa experiencia persoal. A segunda acción é a intervención dunha educadora ou educador experta en igualdade de xénero, que guiará a sesión a través de dinámicas participativas e promoverá a interacción entre o alumnado e a vítima. E a terceira das accións é unha charla a cargo dun perfil especializado en masculinidades, que abordará as causas e consecuencias dos comportamentos machistas.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
