jueves, 7 de mayo de 2026
Galicia consolida a súa posición como a comunidade española que máis reduciu en 2023 as emisións netas de gases de efectos invernadoiro (GEI) con respecto a 1990 é dicir, a diferencia entre emisións e absorcións, ano de referencia a nivel comunitario para as políticas climáticas.
Así o avanzou esta mañá a conselleira de Medio Ambiente e Cambio Climático, Ángeles Vázquez, durante unha visita ás instalacións de ABCR Laboratorios, en Forcarei, empresa do eido químico e farmacéutico e que, tal e como resaltou, exemplifica a relevancia deste sector para avanzar cara aos obxectivos de descarbonización e transición enerxética, así como para garantir un desenvolvemento sostible e eficiente de Galicia.
Tras explicar que a Xunta acaba de recibir un avance do último Inventario Nacional de Emisións que elabora o Ministerio para a Transición Ecolóxica e o Reto Demográfico, a conselleira explicou que durante o ano 2023 Galicia logrou reducir nun 61,7% as emisións netas de GEI con respecto a 1990, un balance que a sitúa á cabeza do país neste eido e que confirma que o Goberno autonómico vai polo bo camiño na súa estratexia para facer fronte ao cambio climático.
De feito, Ángeles Vázquez lembrou que no anterior informe, correspondente ao ano 2022, Galicia tamén foi a comunidade que experimentou unha maior redución das emisións contaminantes netas, nese caso, cun descenso do 59,8%.
Neste sentido, destacou a importancia de contar cun tecido empresarial comprometido co medio ambiente e a redución das emisións, unha concienciación ambiental da que puxo como exemplo, precisamente, á empresa ABCR, fundada en 2008 e cuxa traxectoria estivo marcada desde entón pola innovación e a súa aposta pola sostibilidade nos seus procesos.
Así, a modo de exemplo, referiuse ao proxecto Eco-Smart Batt, que contou co apoio da Xunta e dedicado ao desenvolvemento de baterías de ion-litio máis sostibles, un obxectivo que conecta directamente coas políticas de transición ecolóxica impulsadas polo Goberno galego. De feito, indicou que, tal como lle transmitiron os responsables da firma, ABCR Laboratorios aspira a que eses novos dispositivos de almacenamento de enerxía reduzan ata un 38% as emisións de dióxido de carbono (CO2).
Este tipo de iniciativas, salientou Ángeles Vázquez, son fundamentais nun momento no que a produción de vehículos eléctricos e híbridos está a aumentar, co que esa rebaixa na emisión de gases de efecto invernadoiro contribuiría a facer fronte aos efectos do cambio climático e á descarbonización da economía.
Así mesmo, a conselleira tamén se referiu á oportunidade que supón para empresas de referencia neste e noutros sectores a existencia de alianzas relacionadas co impulso da economía circular así como no eido da redución dos residuos -como é o seu proxecto para a reciclaxe de gomas de siliconas- e na mellora e implementación de procesos industriais sostibles e eficientes.
Ademais, tras apelar a seguir fomentando a colaboración público-privada para avanzar nos retos de descarbonización, Ángeles Vázquez animou aos responsables de ABCR Laboratorios a sumarse á iniciativa Alianza Galega polo Clima, impulsada pola Xunta.
O Festival de Cans celebrará entre o 19 e o 23 de maio a súa 23ª edición tras recibir 235 obras inscritas, o segundo mellor rexistro da súa historia, e recuperar a súa condición de certame puntuable para os Premios Goya. A competición oficial reunirá 13 curtametraxes nas seccións de Ficción e Animación, con ata 10 estreas e sete cineastas debutantes, xunto a once propostas na categoría Furacáns, dedicada á non ficción. As obras seleccionadas abordan temáticas como o medio ambiente, a saúde mental, a violencia de xénero, a memoria, o despoboamento, a identidade ou o universo LGTBI+, con linguaxes que van do drama social á animación, o terror, a comedia negra ou as narrativas híbridas. As liñas descontinuas, de Anxos Fazáns, na inauguración, e 360 curvas, de Alejandro Gándara e Adriana Silva, na sección de documentais, son algunhas das proxeccións galegas máis sinaladas.
Galicia terá este ano un total de 118 praias en 38 municipios galardoadas coa bandeira azul, un distintivo de carácter internacional co que a Asociación de educación ambiental e do consumidor (Adeac) recoñece anualmente a areais de todo o mundo seleccionados en base a unha serie de rigorosos criterios de sustentabilidade, accesibilidade e servizos. Desde xeito e con 10 distintivos máis que o ano anterior, Galicia concentra case unha de cada sete bandeiras concedidas en España (794) e consolida a súa posición entre as tres comunidades que reciben un maior número de distintivos para as súas praias, xunto con Valencia (que suma 197) e Andalucía (184).
