sábado, 24 de octubre de 2026
Este plan supón un fito nos esforzos do goberno autonómico para adaptarse a un novo escenario definido polos desafíos globais dun mercado hiperconectado e polas novas tendencias de consumo, recollidos nun proceso de diagnose realizado en colaboración coa Federación Galega de Comercio, e que contou coa participación de máis de 300 representantes de federacións e asociacións de comerciantes, centros comerciais abertos, prazas de abastos, venda ambulante, grandes superficies, artesás, autónomos, cámaras de comercio, persoas consumidoras e administración local.
Que ofrece o novo Plan
O Plan estratéxico do comercio de Galicia 2025-2030 serve como guía estratéxica con ambiciosas medidas para asegurar o seu futuro. Entre elas, destacan accións para aumentar a visibilidade e dinamización, como a creación dunha marca unificada para o comercio galego e a recuperación de espazos comerciais urbanos en localidades emblemáticas a través do proxecto 'Vilas Vivas'. A planificación tamén se centra en potenciar o traballo de axentes clave do sector para ofrecer experiencias de compra únicas, como os centros comerciais abertos -mellorando a calidade das súas ofertas- e as prazas de abastos, que son motores do territorio e escaparates dos mellores produtos galegos, promovendo o selo 'Mercados Excelentes' e colaborando cos restaurantes da súa contorna a través da iniciativa 'Prato de Mercado'.
A conexión coa xente moza é outra das prioridades, abordándose de dúas maneiras: por un lado, a través de accións como a campaña 'Localízate', que busca que este grupo estableza vínculos co comercio local; e, por outro, prestixiando a actividade comercial para fomentar novas vocacións emprendedoras que aseguren a necesaria remuda xeracional, apoiando proxectos sólidos e viables que se adapten á evolución dos clientes e ás necesidades do territorio.
Compromiso coa competitividade
Entre as diversas medidas para impulsar a competitividade do sector, o documento enfócase en aspectos clave como a promoción da dixitalización, que inclúe accións innovadoras como a creación de espazos de demostración tecnolóxica para comerciantes en feiras de Galicia. Tamén se aposta pola modernización dos espazos comerciais como ferramentas atractivas de venda e por aumentar a capacitación profesional, implementando microformacións dixitais en temas específicos de interese para os negocios ou un plan de formación para os xestores de centros comerciais abertos e prazas de abastos.
Tamén se desenvolverán accións específicas para fomentar o emprendemento e a continuidade de negocios rendibles, buscando sinerxías coa Rede de Polos e atraendo talento de perfís estratéxicos como a mocidade e os galegos que regresan. Asegurar a remuda xeracional é un dos obxectivos principais para a Artesanía de Galicia, promovendo a recuperación de oficios tradicionais con iniciativas como bolsas de aprendices en paralelo ao programa Aprender da Tradición.
Medidas para dinamizar o comercio
En relación co segundo dos eixos, que busca fomentar a visibilidade e o consumo no comercio local (xunto con iniciativas destacadas como os Bonos Activa Comercio ou as xa mencionadas 'Vilas Vivas', 'Prato de Mercado' e 'Localízate', tamén se subliña a colaboración nas Áreas Rexurbe, enfocada na recuperación de conxuntos históricos de vilas e cidades galegas. Tamén hai medidas en favor doutras figuras clave do comercio galego, como o distintivo de calidade Feiras de Galicia para o comercio ambulante, e os obradoiros artesanais (impulsando diferentes vías de comercialización da Artesanía de Galicia e organizando novos programas de divulgación como Artesanía na Escola).
Reforzo da coordinación do sector
Con respecto ao terceiro eixo, o Plan establecerá un modelo activo baseado no coñecemento e na participación de todo o sector, a través da Mesa do Comercio Galego, un instrumento para a adecuada colaboración entre todo o ecosistema e as administracións públicas, en paralelo ao traballo que xa se está realizando a través das mesas locais de comercio, cuxo papel se seguirá fortalecendo. Tamén se promoverá a colaboración en prol do comercio coa Fegamp, as cámaras de comercio e os recintos feirais. Ademais, reforzarase a labor do Instituto Galego do Consumo e da Competencia en defensa dos dereitos das persoas consumidoras e, por conseguinte, da calidade dos servizos do sector comercial.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
