viernes, 16 de enero de 2026
O presidente galego sinalou que é máis importante que nunca volver reafirmar que seguimos de acordo neses principios que nos unen e que non queremos ser máis que ninguén pero desde logo non imos admitir ser menos.
Rueda apostou polo diálogo e por chegar entre todos a obxectivos comúns, sinalando que o encontro de hoxe serve para lanzar unha mensaxe clara a quen ten a obriga incumprida de sentarnos a todos. Queremos sentarnos para falar, sinalou, dun novo modelo de financiamento no que Galicia vai reclamar non menos de 500 millóns máis ao ano.
Subliñou que a comunidade xestiona os seus recursos con responsabilidade e que non vai permitir que se nos trate como unha comunidade de segunda para rescatar a outros a calquera costa, á nosa costa.
Sobre a mutualización da débeda sinalou que, tal e como está proposta, a Galicia só lle supón o aforro de xuros, e non serve para poñer en marcha novas actuacións. Apuntou, ademais, en relación á reunión técnica co ministerio prevista para o vindeiro 21 de abril, que a Xunta acode sempre aos encontros co Goberno, pero que se só é para falar da débeda e nada máis a nós non nos interesa e aí acabou a reunión.
Xestión equilibrada do lobo
No referido á xestión do lobo, ambos gobernos coincidiron na necesidade dun modelo equilibrado que garanta a conservación da especie sen poñer en risco a gandería extensiva, esencial para o desenvolvemento do medio rural.
Rueda sinalou que é posible a coexistencia sen caer en posturas maximalistas e sen que se tomen decisións en base a cuestións ideolóxicas sen ter en conta aos que están sobre o terreo. Así, avogou por preservar a presenza do lobo dun xeito ordenado e coordinado e que non poña en perigo as actividades humanas no medio rural.
Ambas administracións acordaron fortalecer a súa cooperación mediante o intercambio de datos e experiencias, ademais de promover solucións técnicas que permitan a convivencia entre a fauna silvestre e a actividade do sector primario.
O presidente da Xunta, Alfonso Rueda, tras manter hoxe un encontro co seu homólogo na Rioxa, Gonzalo Capellán, volveu rexeitar a proposta de modelo de financiamento autonómico feita polo Goberno central xa que rompe a solidariedade e a igualdade entre as comunidades. 'No caso de Galicia, saímos especialmente prexudicados porque se rompen principios que para nós son absolutamente irrenunciables como a negociación conxunta, a exclusión de bilateralidades, o mantemento da solidariedade e da igualdade en servizos básicos entre todos os territorios', apuntou. 'Somos algo máis do 6,5% da poboación axustada de España e na nova repartición non chegariamos nin ao 3% dos recursos'.
Galicia volve bater o seu propio récord con 429 transplantes e 143 doadores de órganos durante o ano 2025. Da cifra total de transplantes do pasado ano, 229 foron de ril, dos que 22 procedían de doadores vivos; 116 de fígado; 7 de páncreas; 26 de corazón e 51 de pulmón. Estes 429 transplantes beneficiaron a un total de 420 pacientes, tendo en conta que algúns casos foron de transplantes multiorgánicos. Os transplantes pancreáticos, que son os máis complexos, experimentaron a maior subida: incrementáronse un 75 % con respecto ao ano anterior, desde os 4 realizados en 2024 aos 7 de 2025.
