viernes, 5 de junio de 2026
A Xunta de Galicia promove a participación de máis dunha vintena de entidades do ecosistema galego de I+D+i no foro europeo Transfiere, que se celebra entre hoxe e o venres no Palacio de Feiras e Congresos de Málaga, onde están a explorar novas alianzas e oportunidades para os seus proxectos e capacidades de transferencia de coñecemento.
A delegación galega, encabezada pola Consellería de Educación, Ciencia, Universidades e FP a través da Axencia Galega de Innovación, conta cun stand institucional na feira no que están representados tamén a Consellería de Medio Ambiente e Cambio Climático, a Consellería de Economía e Industria e a Consellería de Sanidade; as universidades da Coruña, Santiago e Vigo, con seis dos centros de investigación da Rede CIGUS (CiMUS, CiTIUS, CiQUS, CRETUS, AtlanTTic e CIM); a Fundación Instituto de Investigación Sanitaria de Santiago de Compostela (IDIS); o Instituto de Investigación Biomédica da Coruña (INIBIC); a Alianza Tecnolóxica Intersectorial de Galicia (ATIGA), con cinco dos seus centros (AIMEN, ANFACO, CETIM, CTAG e GRADIANT); o Centro de Supercomputación de Galicia (Cesga), o Centro Tecnolóxico do Mar (Cetmar), o Digital Innovation Hub de Galicia (DIHGIGAL), a Fundación Empresa-Universidade Galega (Feuga), o Clúster Tecnolóxico Empresarial das Ciencias da Vida de Galicia (Bioga), o Clúster Galego de Solucións Ambientais e Economía Circular (Viratec) e Unirisco.
A Xunta de Galicia participa tamén en varias mesas redondas do evento para compartir a súa experiencia e visión sobre as políticas públicas de apoio á transferencia de coñecemento. A directora da Axencia Galega de Innovación, Carmen Cotelo, que participou hoxe na inauguración do evento, intervirá mañá nunha mesa redonda sobre o Plan Complementario de Transferencia e o seu impacto rexional. A directora poñerá o foco na colaboración público-privada para impulsar a transferencia de coñecemento e explicará o impulso a convocatorias como as Unidades Mixtas de Investigación ou Nexos.
Ademais, a Consellería de Ciencia participará noutras dúas mesas redondas sobre como maximizar o financiamento público da I+D+i a través da cooperación territorial e sobre o futuro da carreira profesional na transferencia de tecnoloxía. Estas sesións permitirán poñer en valor o programa Ignicia Transferencia de Coñecemento e as novas actuacións previstas no Plan Galego de I+D+i 2025-2027 para impulsar a valorización do coñecemento, como o impulso do emprendemento científico a través do modelo venture building e a creación dunha oficina piloto de valorización do sector biotecnolóxico.
O programa Ignicia, no marco do cal se inscribe a participación neste evento, busca mellorar a transferencia dos resultados da investigación realizada nos centros de coñecemento galegos ao tecido produtivo. Singular e pioneiro en España, apoiou desde 2016 un total de 32 proxectos, dos que 13 xa están no mercado, e se crearon 10 spin-offs e tres acordos coa gran industria, cun investimento de 16,6M. Estes proxectos deron pé a crear 140 empregos de alta cualificación e a captación de máis de 26M.
Proxectos da Compra Pública Innovadora
Pola súa banda, a directora xeral de Enerxías Renovables e Cambio Climático, Paula Uría, presentou hoxe o proxecto SICLE CO2, que é un dos proxectos beneficiados ao abeiro da Compra Pública Innovadora e que ten como obxectivo unha solución integral para o desenvolvemento do mercado voluntario de créditos de carbono. Esta iniciativa, que comprendería o período 2025-2028, suporía un investimento de 6,8 millóns de euros dos que 4,1 millóns de euros se corresponden con fondos europeos.
Este proxecto incorpora innovacións de vangarda que permiten unha monitorización precisa e en tempo real dos sumidoiros naturais de carbono. Deste xeito, este sistema avanzado optimiza a análise e seguimento do potencial de absorción dos distintos ecosistemas, facilitando a toma de decisións orientadas á compensación de emisións, ao tempo que garante a transparencia e seguridade nas transaccións de créditos de carbono mediante ferramentas dixitais integradas.
Finalmente, a directora xeral de Estratexia Industrial e Solo Empresarial, Margarita Ardao, tamén participará mañá nunha mesa redonda sobre a creación de riqueza a través da innovación, falando sobre o presente e o futuro das iniciativas estratéxicas de Compra Pública de Innovación.
Sobre Transfiere
Transfiere é un dos principais eventos europeos sobre I+D+i e transferencia. O seu obxectivo é conectar todo o sistema español de innovación e impulsar a súa proxección internacional. Os seus eixos temáticos son o talento, o desenvolvemento científico-tecnolóxico, o acceso a investimento e as oportunidades de negocio, co fin último de xerar alianzas y sinerxías globais. Neste marco, a Xunta impulsa a participación neste evento co obxectivo de facilitar oportunidades de colaboración para a investigación e a innovación feitas en Galicia.
Grandes expertos en viaxes en longa distancia, os habitantes do Pacífico levaron vidas cosmopolitas moito antes de que os europeos chegasen á rexión. Son considerados ademais uns artistas excepcionais que crean fermosos obxectos para a súa vida cotiá con elementos naturais como pedra, madeira, fibras ou cunchas. Abanos, anzois, tecidos, armas, canoas... cada obxecto está belamente traballado, con decoracións impregnadas dun significado espiritual e profundo: a arte forma parte de todos os aspectos da vida. Voces do Pacífico estrutúrase así en sete ámbitos temáticos que se achegan a diferentes aspectos da arte e as tradicións de Oceanía e que inclúen o tecido, a danza, a talla ou as tecnoloxías de navegación.
Foi presentado o Wake Up! SdC, que se celebra os días 5 e 6 de xuño en Santiago de Compostela. Tras catro edicións de gran formato celebradas na Coruña, o Wake Up! inicia unha nova etapa na capital de Galicia, coa Cidade da Cultura de Galicia como escenario, consolidándose como unha referencia dentro do circuíto estatal de música electrónica. O cartel ofrece algunhas das figuras máis recoñecidas da escena internacional e nacional, cun cartel encabezado por artistas de referencia como Ben Klock, Joris Voorn, Fatima Hajji, Ben Sims, Lee Ann Roberts ou Vendex, xunto a outros nomes destacados do panorama actual como Alarico, Future.666, The Lady Machine, Blasha & Allatt, Dax J ou Pawlowski.
