sábado, 7 de noviembre de 2026
O secretario xeral da Lingua, Valentín García, participou hoxe na presentación da oitava edición do festival Alguén que respira!, unha cita organizada co apoio da Xunta de Galicia para poñer en valor o talento dos creadores galegos e a calidade das letras galegas a través da poesía.
Así, durante a presentación no Pazo de Raxoi, o representante da Consellería de Cultura, Lingua e Xuventude destacou que este certame, que se celebrará o vindeiro día 21 coincidindo co Día Mundial da Poesía, reunirá poetas, xornalistas, activistas e artistas de todo o mundo, como mostra do gran momento que está a vivir a cultura. Nesta mesma liña tamén incidiu na calidade das letras galegas que ano tras ano van sumando máis recoñecemento e que, sen dúbida, son os mellores embaixadores da nosa identidade, apuntou.
O secretario xeral da Lingua remarcou así mesmo o compromiso do Goberno galego na colaboración con iniciativas que poñan en valor as nosas letras tanto dentro como fóra das nosas fronteiras, tal e como se está facendo no marco da renovación do Plan xeral de normalización da lingua galega, no que se está a traballar actualmente.
Recitais, concertos e faladoiros
O festival Alguén que respira! celebrarase no Teatro Principal de Santiago de Compostela do 20 ao 22 de marzo. Durante esas tres xornadas haberá recitais, concertos e faladoiros onde participarán máis de 40 poetas, músicos ou performers como a autora galega Miriam Reyes; a poeta irlandesa Ailbhe ní Ghearbhuigh; os poetas palestinos Sammer Abu Hawwash e Mohamad Bitari, e o crítico literario Xosé María Álvarez Cáccamo, que será o responsable da lectura do manifesto da cita.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
