viernes, 30 de octubre de 2026
A boa acollida da exposición O Camiño en Viñetas, promovida por Turismo de Galicia, asegura a súa continuidade durante dous meses máis. En concreto, poderá visitarse ata o día 30 de marzo despois de ser inaugurada o pasado mes de novembro no Museo das Peregrinacións e de Santiago. Máis de 7.500 persoas xa a visitaron ata o pasado 31 de xaneiro.
A mostra leva o Camiño de Santiago ata novas formas de expresión, como son o cómic e a banda deseñada e artéllase arredor da publicación A aventura xacobea de Simón Martel, centrada na adolescente que lle da nome. Esta é unha personaxe de longa tradición no cómic galego, protagonista de sete libros desde 1994, ano no que se publicou o primeiro. Neste caso, Martel lánzase a percorrer o Camiño cos seus tíos e un amigo. Durante o percorrido vanse cruzando con distintos personaxes reais e situacións a través das que repasar a historia e a importancia das peregrinacións a Santiago.
Concretamente, ata finais de xaneiro, 7.505 persoas visitaron este proxecto expositivo, o que da a medida do interese por afondar en novas formas de representación do Camiño de Santiago, que permiten achegar a súa traxectoria histórica e transcendencia a distintos públicos. Isto entronca coa estratexia de Turismo de Galicia de divulgar e promover as rutas xacobeas desde calquera expresión en xeral, como son neste caso a creación artística e o humor.
O Camiño en viñetas é unha produción de Turismo de Galicia e conta coa colaboración de Fausto Isorna, debuxante; Gemma Sesar, quen se encargou do argumento; e de Pablo Rosendo, Pepe Quintela, Axeitos&Co e Daexga, que participaron no deseño e montaxe.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
