viernes, 23 de octubre de 2026
O secretario xeral Técnico e do Tesouro, David Cabañó, destacou hoxe no Parlamento que a condonación da débeda das comunidades sería "un mal negocio para Galicia", ao incrementar en 470 euros a débeda por habitante.
En resposta a unha pregunta oral, David Cabañó incidiu en que a condonación é unha redistribución da débeda, é dicir, non desaparece, senón que se redistribúe entre todos os españois, prexudicando ás comunidades menos endebedadas. Así, no caso de Galicia, cada galego deixaría de asumir 896 euros de débeda galega e pasaría a ter que asumir 1.366 euros de débeda do conxunto das CC.AA.
Así mesmo, lembrou que a condonación tampouco daría ás comunidades unha maior capacidade de gasto, ao non permitir utilizar o importe para incrementar políticas de gasto. "É dicir, non é certo que se poida dedicar o importe da quita a sanidade, a educación ou a dependencia. Unicamente se deixaría de pagar unha cantidade de xuros que tería que pagar o Estado e que, polo tanto, tería que detraer doutras políticas de gasto nos orzamentos de cada ano", explicou, facendo fincapé en que só as comunidades máis endebedadas sairían beneficiadas.
Diante deste panorama, o secretario xeral Técnico e do Tesouro afirmou que o prioritario para Galicia é negociar un modelo de financiamento que teña en conta aquelas variables que determinan que o custe de prestar os servizos en Galicia é superior que noutros territorios. A diferencia da condonación da débeda, a mellora do sistema de financiamento si nos permite ter unha maior capacidade de gasto e si nos permite mellorar a prestación dos servizos, incidiu.
Nesta liña, concluíu recordando que o Acordo adoptado no Parlamento de Galicia en 2023 non pon nada de que se estea a favor dunha quita de débeda, senón que pon o foco no importante, en que se aborde a reforma ponderando o custe que supón a dispersión e o avellentamento, nun modelo xusto de financiamento da Administración Local e que se trate a todas as comunidades por igual, sen que se produzan agravios.
A primeira etapa da xira de A Gaivota, ensaio aberto desenvolveuse do 12 ao 15 de outubro na sala Atahualpa do Teatro El Galpón de Montevideo, en coprodución con esta institución e no marco do Festival Internacional de Artes Escénicas de Uruguai, FIDAE. O programa comprendeu sete representacións nas que Déborah Vukuić compartiu escenario con Camila Durán e Claudia Trecu, que entraron no lugar das actrices galegas Uxía Suevos e Mercedes Castro. A magnífica resposta do público uruguaio contou cunha destacada presenza da comunidade galega, que converteu as funcións nun espazo de encontro arredor da lingua e da creación escénica de Galicia. Esta acollida precede a chegada á Arxentina, onde Déborah Vukuić compartirá escenario coas actrices locais Eugenia Alonso e Carmela Rivero.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
