viernes, 28 de noviembre de 2025
A conselleira de Medio Ambiente e Cambio Climático, Ángeles Vázquez, participou hoxe no Comité de Autoridades Competentes da Demarcación Hidrográfica Galicia-Costa, no que, entre outras cuestións, se aprobou por unanimidade a actualización e revisión da avaliación preliminar do risco de inundacións (EPRI) para o ciclo 2028-2033.
Segundo dixo a conselleira, esta aprobación supón un paso previo fundamental para o desenvolvemento do Plan de xestión de risco de asolagamentos así como do Mapa de perigosidade xa que incorpora a proposta de Áreas con risco potencial significativo de inundación (ARPSI). Nese senso, esta nova planificación incorpora dúas novas ARPSIS fluviais, en Oleiros e Ferrol, e amplía unha xa existente no concello de Ponteceso. Deste xeito, en total alcánzase un total de 172 ARPSIS fluviais e 28 costeiras, engadiu Ángeles Vázquez.
A maiores, este documento, ademais dos eventos de inundación ocorridos entre 2018 e 2023, recolle tamén as proxeccións do Grupo Intergobernamental de Expertos sobre o Cambio Climático (IPCC), que indican un aumento de eventos extremos con choivas máis intensas e maior frecuencia de asolagamentos. Así, segundo indicou a conselleira, é fundamental a análise da situación actual así como o deseño e a toma de decisións que permitan unha mellor adaptación aos novos retos climáticos.
Ademais, na reunión celebrada hoxe en Santiago de Compostela, tamén se fixo un seguimento do Plan de xestión de risco de inundación (PXRI) 2023, que ten como obxectivo reducir os impactos dos asolagamentos coa implementación de medidas estruturais e non estruturais. Esta análise permitiu avaliar o grao de execución das actuacións desenvolvidas como o reforzo dos sistemas de alerta, as obras de mitigación do risco en áreas prioritarias ou a divulgación de campañas de sensibilización sobre esta materia.
Para concluír, a conselleira puxo en valor a coordinación, a cooperación e a implicación de todos os membros do Comité de Autoridades Competentes da Demarcación Hidrográfica Galicia-Costa de cara ao desenvolvemento de accións que garantan o cumprimento dos prazos establecidos na normativa vixente así como das medidas preventivas e correctivas necesarias para a xestión sustentable da auga.
O director xeral de Relacións Exteriores e coa Unión Europea, Jesús Gamallo, participou hoxe na Comisión de Política Económica (ECON) do Comité Europeo das Rexións (CdR). No encontro, celebrado en Bruxelas, os representantes das rexións e cidades aprobaron un ditame sobre a Estratexia do Mercado Único. A Comisión Europea presentou esta estratexia en maio de 2025 para fortalecer o mercado interior da UE mediante a redución de barreiras comerciais, a simplificación de trámites, a promoción da dixitalización e o apoio ás pemes e ás startups. Esta decisión conta co apoio do Comité das Rexións e de Galicia, que pide á Comisión que vaia un paso máis alá eliminando as barreiras que seguen a limitar o potencial dun mercado de 450 millóns de consumidores, o segundo maior do mundo na actualidade.
A Consellería de Sanidade publica o informe de actividade das infeccións respiratorias agudas correspondente á semana do 17 ao 23 de novembro, que sinala que a actividade gripal en Galicia segue con intensidade baixa e tendencia crecente. Respecto da semana anterior, rexístrase un aumento na taxa de consultas por gripe en atención primaria dun 40,3 %. Así, esta taxa sitúase en 72,1 consultas por 100.000 habitantes. Produciuse aumento da taxa en todos os grupos de idade, destacando o grupo de 0 a 4 anos cun aumento do 78 %. Os grupos coa maior taxa de consultas seguen a ser o de 0 a 4 anos con 188,4 consultas por 100.000 habitantes. No que atinxe ás áreas sanitarias, incrementáronse as consultas en todas elas, duplicándose o valor na área de Vigo e rexistrando un aumento das súas taxas as áreas de Ourense (96,6 %) e de Lugo (79,3 %).
