sábado, 7 de noviembre de 2026
A produtora coruñesa Vaca Films rematou en Galicia a gravación da película Dímelo bajito, despois de sete semanas de traballo en diferentes espazos da Coruña e Lugo que serven de localizacións para esta longametraxe producida para a plataforma Prime Video e que conta cunha achega de 300.000 euros do fondo de atracción de rodaxes convocado pola Xunta.
O director da Axencia Galega das Industrias Culturais, Jacobo Sutil, compartiu co equipo da película unha das últimas xornadas de filmación no set instalado no encoro das Forcadas, no municipio de Valdoviño. Esta é unha das paraxes que acolle as escenas da película xunto a contornas naturais como as Fragas do Eume, o Bosque de Ledoño-Celas de Peiro, a presa de Cecebre e outros espazos en vilas das provincias da Coruña e Lugo, como Bergondo, Outes, Perbes, Ourol ou Viveiro.
Con dirección de Denis Rovira, Dímelo bajito é un guión de Jaime Vaca sobre a novela homónima de Mercedes Ron. Alicia Falcó, Fernando Líndez e Diego Vidales protagonizan este drama de personaxes cun elenco que completan Patricia Vico, Andrés Velencoso, Eve Ryan, Fernando Nagore e mais a galega Celia Freijeiro, entre outros. A súa estrea está prevista en Prime Video en 2025.
O apoio do Goberno galego ao proxecto materialízase a través da liña de axudas para a atracción de rodaxes, cofinanciada pola Unión Europea no marco do Programa Galicia Feder 2021-2027. Na súa convocatoria de 2024, este fondo conta cunha dotación de 2.000.000 euros co obxectivo de impulsar a proxección do noso territorio como plató de producións audiovisuais lideradas tanto por empresas galegas como do resto de España e Europa. Ao tempo, garántese un gasto mínimo no territorio galego por cada proxecto subvencionado, que se sitúa en 1.000.000 de euros no caso das produtoras galegas e en 1.500.000 euros no das foráneas. Ademais de Dímelo bajito, as rodaxes das longas Romería e Rondallas, e das series Garbo e Marusía acadaron xa tamén financiamento a través desta canle.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
