jueves, 31 de julio de 2025
O director xeral de Cultura, Anxo M. Lorenzo, inaugurou hoxe a mostra Convidadas: dúas miradas de Zuloaga, que acolle o Museo de Belas Artes da Coruña e coa que se inicia un novo ciclo de exposicións que traerá obras doutros museos e coleccións españolas a este espazo. Esta primeira proposta é unha colaboración co Museo Nacional Centro de Arte Reina Sofía que achega ata a institución coruñesa dous retratos feitos por Ignacio Zuloaga, mantendo un diálogo con outras obras da propia colección permanente do museo.
Durante a presentación, o director xeral de Cultura puxo en valor as conexións artísticas de Zuloaga con Galicia, a simboloxía das súas pinturas e a influencia noutros pintores galegos como Xesús Corredoyra. Neste senso, fixo fincapé no compromiso do Goberno autonómico en seguir apoiando aos centros museísticos na promoción da arte e doutras actividades que completan a diversa oferta cultural da Comunidade.
A rusa e a galega
A mostra Convidadas: dúas miradas de Zuloaga estará aberta ao público ata o vindeiro 23 de febreiro de 2025 na sala cinco do Museo de Belas Artes da Coruña. As obras seleccionadas son dous retratos do artista Ignacio Zuloaga (1870-1945), pintados ambos en París en 1912, que exemplifican o seu amplo labor como retratista e no que conflúen tendencias das vangardas francesas con evocacións da retratística de Velázquez ou Goya.
Son dúas figuras femeninas, o Retrato da señora Mlinowska e a Rusa e A bailaora Antonia, a galega, que ofrecen dúas visións diferentes da maneira de concibir a imaxe da muller por parte de Zuloaga. A elección destas obras responde á vinculación con Galicia, xa sexa por cuestións vitais, como é o caso de Malinowska, como polos motivos representativos ou simbólicos, implícitos no apelativo da bailaora.
O Instituto da Lingua Galega da USC (ILG) acaba de publicar, en colaboración coa Fundación Barrié e USC Editora, o Atlas Lingüístico Galego VIII. Léxico. O ser humano (III). Trátase do oitavo volume do Atlas Lingüístico Galego (ALGa), obra de investigación dialectolóxica amplamente recoñecida no eido dos estudos europeos 'pola rigorosidade dos seus datos e a excelencia das súas visualizacións cartográficas', explican. O novo tomo, froito do traballo dos profesores Rosario Álvarez, Francisco Dubert e Xulio Sousa, está constituído por 280 mapas que dan conta das variedades léxicas no dominio do galego para 259 conceptos vinculados á educación, a música, os xogos, as actividades de lecer, a relixión, as festas relixiosas e profanas, os seres míticos, as características psicolóxicas do ser humano e a roupa e o seu coidado.
O festival de circo, clown e creatividade escénica Festaclown regresa cunha nova edición a Vilagarcía de Arousa, onde ofrecerá, entre o 18 e o 23 de agosto, unha programación ao aire libre para celebrar o circo contemporáneo e servir de encontro entre diferentes xeracións e culturas a través de espectáculos que combinan o humor e as acrobacias co compoñente solidario. O festival arrancará o luns 18 na praza de Galicia e diferentes rúas, polas que o artista catalán Nacho Flores levará unha peza de circo contemporáneo, moi poética e visual, con música en vivo e inspirada nun imaxinario mitolóxico, na que o protagonista cabalgará facendo equilibrios entre minotauros e cabalos de Troia.
