martes, 3 de noviembre de 2026
O conselleiro do Mar, Alfonso Villares, mantivo o seu primeiro encontro informal de traballo por videoconferencia co candidato a novo comisario de Pesca e Océanos, o chipriota Costas Kadis, co obxectivo de trasladar a vontade do Goberno galego de traballar conxuntamente xunto ao Executivo comunitario neste novo mandato no impulso e desenvolvemento das políticas pesqueiras.
Alfonso Villares e Costas Kadis intercambiaron impresións sobre a situación actual do sector no continente así como da frota galega. O responsable autonómico destacou a necesidade de avanzar no level playing field para que as frotas comunitarias operen en igualdade de condicións coas de terceiros países o que á súa vez permitiría reforzar a soberanía alimentaria do continente, en liña coa folla de ruta anunciada pola presidenta da Comisión Úrsula von der Leyen.
O responsable autonómico manifestou o interese de afondar sobre estes e outros asuntos de interese para o sector pesqueiro da comunidade en vindeiras reunións unha vez que finalice o proceso de confirmación da nova Comisión no Parlamento Europeo. Tamén convidou a Kadis a visitar Galicia, principal rexión pesqueira de Europa, para coñecer de primeira man a realidade da cadea mar-industria galega e o traballo que se vén desenvolvendo desde os centros de investigación mariña da comunidade.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
