sábado, 7 de noviembre de 2026
O proxecto xestouse a finais do ano pasado dentro do programa de Residencias Artísticas do Gaiás coa profesora e investigadora da Universidade do País Vasco, Mari Luz Esteban, o musicólogo e gaiteiro Llorián García e o historiador e artista sonoro Andrés Rodrigues, coordinados polo investigador do Incipit-CSIC, Íñigo Sánchez-Fuarros.
Textos de filosofía, ensaio, artigos científicos e literarios de autores e autoras contemporáneas como Susan Sontag, Emily Dickinson, Adriana Cavarero, Claes Anderson ou Flora Fong entrelázanse coas paisaxes sonoras e os audiovisuais da peza, nos que destaca tamén a colaboración da bailarina e coreógrafa galega Sabela Domínguez. O conxunto forma un novo tecido sensorial a través do que volver a sentir e repensar o xeito no que o ser humano se relaciona entre si e coa súa contorna.
Aínda que as entradas para Mudar a pel están esgotadas, as familias que asistan aínda poden reservar praza no obradoiro infantil gratuíto que decorrerá en paralelo ao concerto co fin de favorecer a conciliación. As reservas pódense facer a través de Ataquilla ou no despacho de billetes do Museo Gaiás.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
