jueves, 1 de mayo de 2025
O director xeral de Cultura, Anxo M. Lorenzo, participou hoxe na presentación das XXVI Xornadas de homenaxe ao autor Ramón María del Valle-Inclán que se celebran na Pobra do Caramiñal desde este domingo ata finais de mes. Trátase dunha ampla programación, impulsada co apoio da Xunta de Galicia, que inclúe a celebración dunha quincena de actividades diversas arredor da figura deste ilustre.
Durante o acto, o representante da Consellería de Cultura, Lingua e Xuventude destacou o compromiso do Goberno galego con estas xornadas xa consolidadas no panorama cultural tras máis de 25 anos celebrándose ininterrompidamente. Deste xeito, puxo en valor o traballo do museo Valle-Inclán, na organización desta cita e na dedicación por manter vivo o legado dunha das figuras máis destacadas da cultura galega, que sigue sendo a día de hoxe, un gran referente e fonte de inspiración para os dramaturgos do mundo.
No marco desa presentación, o director xeral de Cultura destacou a calidade das iniciativas que terán lugar ata finais deste mes coincidindo coa conmemoración do nacemento do ilustre escritor onde predominarán as sesións teatrais. Ademais salientou a imaxe do cartel deste ano do ilustrador Siro López, onde se representa a esencia do recoñecido escritor.
Neste senso, salientou a importancia destas 15 actividades por lembrar, homenaxear e poñer en valor a traxectoria de Valle-Inclán a través de propostas como conferencias de divulgación científica, presentacións de libros, espectáculos de narración oral, obras teatrais, actividades plásticas, exposicións ou sesións de monicreques.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
