jueves, 1 de mayo de 2025
O programa, dividido en dúas sesións, inclúe os filmes finalistas nas categorías de Mellor Curtametraxe de Animación e Mellor Curtametraxe de Imaxe Real dos pasados Premios Mestre Mateo, con varios títulos que contaron co apoio da Xunta de Galicia para o seu desenvolvemento. No bloque de ficción poderán verse Antes de que se poña o sol, de Nani Matos; Nena, dirixida por Xosé A. Touriñán e Jairo Iglesias, O coidado, de Miguel Canalejo; O neno sardiña, de Lucía Estévez; e Ulises, de Félix Brixel. Na categoría de animación exhibiranse O monstro e a nena, de Jorge J. Costas; To bird or not to bird, dirixida por Martín Romero e premiada na última edición dos Goya; Illa Cordura, de Mario Fernández Filloy; e In Half, de Jorge Morais.
Audiovisual no rural
A inclusión das curtametraxes na programación do ciclo constitúe unha aposta pola accesibilidade á cultura nas áreas rurais, polo que conecta cun dos obxectivos principais da Consellería de Cultura, Lingua e Xuventude para esta lexislatura, e pola promoción do cinema no formato de duración reducida, moi vinculado aos talentos emerxentes e que non dispoñen de circuítos de distribución e exhibición estables.
As dúas sesións de curtametraxes proxectaranse nas localidades que están a programar o ciclo Mestre Mateo nas catro provincias galegas. Na da Coruña haberá proxeccións na Laracha, Betanzos, Boiro, Cedeira, Valdoviño e Vimianzo; na de Lugo poderán verse na Pobra do Brollón, A Fonsagrada, Taboada, Foz, Meira, Monterroso, Sarria e Vilalba; na de Ourense chegarán a Celanova, San Cristovo de Cea e Ribadavia; e na de Pontevedra están programadas nas Neves, Cerdedo-Cotobade e Ribadumia. Están por pecharse as proxeccións noutros catro concellos que se engadirán ao programa nas próximas datas.
Escaparate da produción galega
O ciclo Mestre Mateo incorpora así o formato curto no seu terceiro ano de andaina, fortalecendo unha programación na que xa están presentes longametraxes de ficción e documentais, convertendo esta iniciativa nun dos mellores escaparates da produción galega, cuxa calidade vén referendada pola selección previa dos galardóns que outorga a Academia Galega do Audiovisual.
Con esta iniciativa facilítase un espazo para a proxección deste tipo de pezas co obxectivo de aumentar a presenza de voces novas e diversas no noso audiovisual e permitir que unha nova xeración de creadores e creadoras atope máis facilidades á hora de desenvolver estes proxectos, que adoitan ser o primeiro paso dunha carreira. Ao tempo, achégaselle ao público un tipo de cinema que ofrece propostas estimulantes nas que se experimenta tanto nas formas como nas temáticas.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
