viernes, 6 de noviembre de 2026
Estas novas instalacións está orientadas a traballos de extinción, pero tamén de prevención no sur da provincia de Ourense, de xeito que non só se pretende loitar contra os lumes xa declarados, senón tamén poder anticiparse a eles e limitar as súas consecuencias.
A nova base conta cunha plataforma de estacionamento para catro helicópteros, e cun aeródromo con pista de aterraxe de case 1,2 km. de lonxitude, o que lle dá unha capacidade de seis aeronaves de carga en terra. Ten ademais instalacións de carga de combustible e catro depósitos de auga semisoterrados, o que fai que as cargas non interfiran coas operacións das aeronaves. De feito, conta cun sistema con dúas estacións de carga de avións que permite operar simultaneamente e de xeito independente na carga de avións e helicópteros.
A torre de control destas novas instalacións ofrece unha visión 360º completa e acristalada, e conta ademais con dous almacéns independentes na planta baixa. No primeiro e o segundo andar atópanse a sala de instalacións e a de control, e tamén hai unha área para as tripulacións, con tres zonas que permiten o aloxamento, en espazos diferenciados, das tripulacións de avións, helicópteros e brigadas contra incendios. Todas as zonas contan con sala de estar, habitacións e aseos, configurándose como espazos nos que conciliar traballo e descanso.
A aposta da Xunta de Galicia pola prevención e extinción de incendios
A posta en marcha desta base de Verín-Oímbra intégrase na actualización do 2024 do Plan de prevención e defensa contra os incendios forestais (Pladiga), que procura a optimización na loita contra os lumes a través de diversas novidades, como son a adquisición de novas máquinas hidrostáticas polivalentes, a ampliación da rede de videovixilancia ou a instalación de novos equipos informáticos e da aplicación informática Xeocode Lite nas motobombas do Servizo.
No relativo ás infraestruturas, compre destacar a base aérea de San Xoán de Río (Ourense), en cuxa mellora se investiron máis de 1,2 millóns de euros, e o Centro Integral de Loita contra o Lume de Toén (tamén en Ourense), no que se investiron máis de 3,5 millóns de euros para convertelo nun espazo de referencia para a formación, a cooperación e a investigación en materia de incendios forestais.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
