sábado, 7 de noviembre de 2026
Ás 18,00, prego no cemiterio de Outeiro de Rei diante da tumba do poeta, con lectura de anacos da súa obra polos amigos e devotos presentes. Culminarán os actos ás 19,00, na Campa de Santa Sabela, coa entrega de "A navalla do Manuel".
As navallas de Manuel María
O Manuel tiña querencia polas navallas como símbolo utilitario de irmandade, usada para partir o pan na mesa familiar e de amizade. Xermolos e a Irmandade Manuel María crearon o premio "A navalla do ManuelÇ" que cada ano se entrega a unha persoa destacada no mundo da cultura, con vencello con Manuel María, e con vocación cultural e social. E tamén cada ano entrega unha medalla a título póstumo a unha persoa que durante a súa vida se distingueu na defensa dos mesmos valores.
"A navalla do Manuel" a un persoeiro da cultura, cos valores que defendía o Manuel, vaise entregar a Luís Fernández Guitián, músico, mestre e escritor, que ostenta a Alcaldía do concello de Sober (Lugo). E a entregada a título póstumo corresponde a María Xosé Neira Maseda, activista sociocultural.
Despois da entrega das navallas, partirase o pan e o queixo a compartir, que serán acompañados por viño da Ribeira Sacra.
Para anotarse ao xantar, hai que chamar ao tfno. 646413890.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
