sábado, 7 de noviembre de 2026
O director xeral de Cultura, Anxo M. Lorenzo, participou hoxe na presentación da programación das XXXIX Xornadas de folclore, unha iniciativa que terá lugar co apoio da Xunta de Galicia e que, do 12 ao 21 de agosto, levará música e danzas tradicionais provenientes de agrupacións de Colombia, México, Panamá, Senegal, Serbia e Taiwán por 16 concellos da provincia de Ourense.
Na súa intervención, o representante da Consellería de Cultura, Lingua e Xuventude puxo en valor o papel destas xornadas para a dinamización cultural do rural, xa que as seis agrupacións, integradas por 182 artistas, percorrerán ademais da cidade de Ourense os concellos de Allariz, A rúa, Bande, O Barco, O Carballliño, Castro Caldelas, Celanova, Entrimo, Maceda, Manzaneda, Ribadavia, Trives, Verín, Viana e Xinzo de Limia.
Neste senso, salientou que en todas estas localidades se ofrecerá un espectáculo de relevancia internacional e explicou que esta programación, ao percorrer estes 16 concellos, completan a totalidade das 12 comarcas que oficialmente conforman a provincia de Ourense. É o único festival capaz de ofrecer actuacións durante dez días continuos nos que a música de raíz é a protagonista, enxalzou.
Aposta por unha cultura accesible e descentralizada
Ademais, valorou o carácter descentralizador desta iniciativa ofrecendo deste xeito a única posibilidade de que os habitantes de localidades tan afastadas como Manzaneda, Viana ou Entrimo, poidan coñecer o folclore e a cultura tradicional doutros países.
Anxo M. Lorenzo precisou que, durante o festival, cada noite realizaranse dous espectáculos en dúas vilas diferentes da provincia. Nestas actuacións, a agrupación amosará a música, o baile e o vestiario tradicional do seu país, polo que tamén destacou o papel divulgador destas xornadas e o intercambio cultural que supón tanto para os veciños e veciñas das localidades onde se celebra, como para as propias agrupacións destes países que entran en contacto coa realidade da nosa música e tradicións.
Finalmente, lembrou que este festival forma parte da campaña CulturON que ten en marcha a Xunta de Galicia para os meses de verán cunha media de 30 actividades diarias.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
