sábado, 7 de noviembre de 2026
O director xeral de Cultura, Anxo M. Lorenzo, inaugurou a exposición Verba Volant, picta mantent. 25 anos das exposicións temporais onde salientou o labor do Museo das Peregrinacións a prol da conservación do patrimonio cultural durante estes 25 anos.
O representante da Consellería de Cultura, Lingua e Xuventude, sinalou que esta mostra fai un percorrido ao longo da programación expositiva sobre o Camiño e a cidade de Santiago, en concreto, e a revalorización do patrimonio galego, en xeral, que o museo leva a cabo dende o ano 1999, coincidindo coa celebración do Xacobeo 99 . É unha sorte percorrer a historia das peregrinacións a través das máis dun cento de obras que se atopan aquí expostas, destacou Anxo Lorenzo.
No percorrido pola mostra conmemorativa, o director xeral de Cultura, puxo en valor o traballo conxunto entre a entidade e os colaboradores, que neste cuarto de século, promoveron iniciativas para revalorizar o patrimonio cultural galego que xira entorno ao Camiño de Santiago e á cidade de Santiago de Compostela, meta da peregrinación xacobea. Neste senso, o director xeral de Cultura destacou a importancia das doazóns que se foron facendo ao longo dos anos e que actualmente conforman un catálogo de máis de 700 obras pertencentes ás exposicións temporais.
A mostra, que se poderá visitar ata o 27 de outubro, compendia un total de 117 pezas de máis de medio cento de artistas que integraron no seu día as 80 mostras expositivas que acolleu o museo durante estes 25 anos como, Peregrinacións no mundo, As outras Peregrinacións ou Patrimonio e Camiño.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
