lunes, 26 de octubre de 2026
A programación ábrese nesta xornada coa inauguración no Pazo da Cultura de Simbiose, mostra que reúne as creacións de 24 artistas de España e Portugal, así como de varios das e dos integrantes do grupo dx5.
Promovido co apoio do Concello de Pontevedra e o financiamento da Universidade de Vigo e da Xunta de Galicia, a través das axudas a grupos de referencia competitiva, Simbiose será inaugurada na tarde deste mércores, nun acto no que participan o alcalde de Pontevedra, Miguel Anxo Fernández Lores, e a vicerreitora do campus, Eva María Lantarón. Previamente, a mostra foi presentada nunha visita guiada da man da directora do grupo dx5, Ana Soler, e varias das e dos artistas participantes, acompañados polo concelleiro de Cultura, Demetrio Gómez. A esencia da gráfica é unha matriz e unha copia e a partir de aí, chegamos á complexidade, explicou Soler do punto de partida dun proxecto que presentou como o cumio de 20 anos de traballo do grupo dx5, explorando esa evolución da arte gráfica cara a complexidade" e cara á idea de "campo expandido.
Do rexistro da pegada á expansión polo espazo
Co obxectivo de que tivese tamén unha dimensión didáctica, como apuntou Soler, a exposición que poderá visitarse ata o 30 de xuño estruturase en catro bloques, que permiten afondar nos diferentes camiños abordados pola arte múltiple neste século XXI. En primeiro termo, a mostra pon o foco no espazo da pegada e no paso do único ao dual, con obras como a instalación con cinta sinalizadora de Victor Solanas, o mural no que Patricia Gómez e María Jesús González representan a galería dun cárcere e as propostas de Pablo Barreiro, Soliman López e Antía Iglesias. Un segundo bloque aborda a expansión do espazo da gráfica, que pasa do dual ao múltiple e nel preséntanse as imaxes de espazos arquitectónicos baleiros de Anne Heyvaert, as pezas de escaiola de Elena Jiménez, que recollen a pegada de diferentes mans durante unha conversa, ou as creacións de Juan M. Moro, Rita de Sousa, José Andrés Santiago e Almudena Fernández Fariña.
A continuación, a mostra detense na conquista do espazo, no paso do múltiple ao complexo, coas creacións de Ángel Massip, Esther Pizarro, Vanessa Gallardo, Carlos Fer e Mario Santamaría , completándose a exposición co bloque conexións mutantes, que afonda noutras propostas ligadas á repetición e transformación. Ese é o caso da obra na que Rubén Tortosa vai rexistrando sobre un papel o voo dun falcón, a creación téxtil de Sara Coleman e as pezas de Maider López, Inma Femenía, Javier Pividal e Ana Soler.
A mostra complétase cunha programación de obradoiros e visitas guiadas, con inscrición previa a través da plataforma Apúntate do Concello.
Un foro que se expande por Pontevedra
Alén desta mostra, o VIII Foro Internacional de Creación na Fronteira comprende outras dúas exposicións, que se inaugurarán este xoves. Por unha banda, a Sala Universitaria Profesor Manuel Moldes estreará Xerminal, na que se presentan os proxectos de seis novos e novas artistas, seleccionados nunha convocatoria aberta a estudantes e egresados de toda España. Por outra, a Fundación RAC albergará Resonancias, conformada por unha selección de obras de Stephen Dean, Isidro Blasco, Ignasi Abali, Antoni Muntadas, Benjamin Torres, Jonathan Hernández ou John Baldessari, pertencentes á colección desta entidade.
Ao mesmo tempo, a Vicerreitoría do campus será sede, nas xornadas de xoves e venres, do ciclo de conferencias Sinerxías, dirixido a promover unha reflexión teórica respecto dos desafíos que emerxen da intersección entre a tecnoloxía e o orixnal mútiple, coa participación de diferentes artistas e investigadores.
Intervencións no espazo físico e no dixital
Esta programación pecharase na tarde do venres cunha visita guiada ás intervencións artísticas desenvolvidas ao abeiro deste proxecto, baixo o nome de Interferencias. Nela agrúpanse propostas como a intervención realizada por Susana Blasco nunha valla publicitaria, a realizada por Soler nas inmediacións do Pazo da Cultura, a desenvolvida por Lucía Romaní en sinais de tráfico ou os carteis de Ampparito que poderán atoparse nos coches. Mais tamén haberá intervencións no espazo dixital, como a deseñada por Sara Piñeiro para o perfil de Instagram do Concello, a que integrantes do grupo dx5 levarán a cabo nas pantallas informativas municipais ou a deseñada por Sabrina Fernández no Diario de Pontevedra.
Foi inaugurada no Museo do Pobo Galego a exposición 'Transfronteiriza', da artista e cineasta tudense Diana Gonçalves, que permanecerá aberta ao público ata o 28 de marzo de 2027. A mostra parte do documental 'Mulleres da Raia', da mesma autora, e froito de tres anos de investigación. A través da linguaxe cinematográfica, de materiais documentais, arquivos históricos e elementos patrimoniais, a proposta constrúe unha experiencia arredor da memoria compartida entre Galicia e o norte de Portugal. En concreto, Transfronteiriza recupera a memoria das mulleres que viviron na fronteira entre ambos territorios a mediados do século XX, que desempeñaron un papel fundamental no comercio transfronteirizo e na supervivencia económica das familias.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
