sábado, 7 de noviembre de 2026
O secretario xeral de Política Lingüística, Valentín García, participou hoxe na presentación da I edición do festival Aquí tamén se fala, impulsado polo IES coruñés Rafael Dieste co apoio da Xunta, o Concello e a Deputación da Coruña, entre outros.
O evento, que reunirá na cidade herculina a artistas contemporáneos do talle de Grande Amore, Boyanka Kostova, Lontreira e Leria, nace co obxectivo de potenciar a música actual en galego, demostrándolle á mocidade que a lingua propia tamén é válida para os espazos de ocio e diversión, así como para a música de moda, destacou o representante da Consellería de Cultura, Lingua e Xuventude.
No acto de presentación, que acolleu o propio instituto coruñés, tamén participaron Soledad Agra, responsable da área de Igualdade, Lingua e Dereitos Civís da Deputación da Coruña; Gonzalo Castro, concelleiro de Fomento e Promoción da Cidade do Concello da Coruña; Mateo Torres, director do centro; Nuno Pico e May, cantantes de Grande Amore e Leria, respectivamente, e alumnado e profesorado do centro.
Promover o uso do galego entre a mocidade
Este festival enmárcase na iniciativa cultura homónima nacida no Equipo de Dinamización da Lingua Galega do instituto Rafael Dieste co obxectivo de promover o uso do galego entre a mocidade. A día de hoxe, involucra máis de 200 centros de toda a comunidade e preto de 50.000 estudantes que, a través de entrevistas, actuacións e campañas nas redes sociais, animan a rapazada a falar na lingua propia de Galicia.
Ademais, a iniciativa volveuse especialmente famosa ao involucrar os clubs deportivos galegos de referencia, como o Deportivo da Coruña, o Celta, o Obradoiro ou o Balonmán Cangas, entre moitos outros; así como a referentes da cultura nacional e internacional como o actor Viggo Mortensen ou os músicos James Rhodes e Amaia Romero.
Coa celebración do festival Aquí tamén se fala, esta iniciativa dinamizadora acada unha nova dimensión aberta a todos os públicos. Así, as persoas interesadas poderán asistir de balde ao evento, que terá lugar o 7 de xuño na Praza da Tolerancia da Coruña a partir das 17.00 h.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
