miércoles, 30 de abril de 2025
O director da Axencia Galega das Industrias Culturais, Jacobo Sutil, interveu hoxe na presentación do espectáculo canda o director do Centro Dramático Galego, Fran Núnez; a propia Tamara Canosa, quen tamén asina a dramaturxia con Xacio Baño, e Raquel Espada e Manuel Cortés, en representación dun equipo interpretativo interxeracional e multidisciplinar. Conviven nel tanto nomes moi coñecidos da escena galega, que xa teñen participado en anteriores producións do teatro público, como caras novas para as que Os actos e as profecías supón o seu debut na compañía institucional.
Ademais de enmarcar o espectáculo no amplo programa da conmemoración destes 40 anos, o responsable de Industrias Culturais subliñou que o Centro Dramático leva traballando máis dun ano nesta proposta ao abeiro do proxecto europeo Phōnē, do programa Europa Creativa. Baixo o lema Dándolles ás linguas minorizadas unha voz, participan nesta iniciativa distintos departamentos da Consellería de Cultura, Educación, FP e Universidades xunto con entidades escénicas doutros sete países: Alemaña, Francia, Irlanda, Italia, Noruega, Países Baixos e Romanía.
Máis accesibilidade
Para Sutil, Os actos e as profecías exemplifica a folla de ruta que está a seguir nos últimos anos o teatro público galego, con especial incidencia neste ano de celebración. Neste sentido, xunto co devandito traballo de internacionalización, que neste caso se centra no contexto europeo, a nova produción afonda na accesibilidade territorial co reforzo do servizo de mobilidade do Centro Dramático Galego, grazas ao que público procedente de medio centenar de concellos das catro provincias fará uso do servizo de autobuses habilitado para asistir ás funcións no Salón Teatro.
Subliñou, así mesmo, a aposta do CDG pola inclusión a través das habituais funcións descontraídas dos mércores, que posibilitan unha atmosfera acolledora para persoas con déficit de atención, espectro autista e deficiencias intelectuais ou sensoriais, e mais a aplicación do seu sistema SINTE para que o público con discapacidade visual e/ou auditiva poida gozar igualmente do espectáculo.
Sinopse
Outra das liñas de acción do CDG que se materializan nesta proposta é o apoio á dramaturxia galega actual, neste caso a través do traballo de Tamara Canosa e Xacio Baño. Co mundo dos talent shows como punto de partida, Os actos e as profecías lanza ao aire cuestións como o lugar do público na creación, a fama, a competición e as decisións vitais marcadas pola procura do éxito.
Segundo a directora do espectáculo, este tipo de espectáculos televisivos conteñen moitas fendas vitais con potencialidade para amosar os puntos de fricción entre a vida e os soños. Para levar esta idea ás táboas, Canosa aposta por un uso diferente do espazo escénico a partir do deseño de José Faro, quen asina tamén a iluminación con Iván Nuñez Casal. Conta, ademais, con Montse Piñeiro e Marta Ferrer Ucelay no vestiario e caracterización, Rut Balbís a cargo do traballo de movemento, Xosé Lois Romero do espazo sonoro e Laura Míguez como axudante de dirección.
As interpretacións corren a cargo de Sergio Abelaira, Marta Alonso Tejada, Mónica Camaño, Miguel Canalejo, Isolda Comesaña, Manuel Cortés, Antón Coucheiro Cou, Iván Davila, Raquel Espada, Xosé Manuel Esperante, Alba Fernández Cotelo, Sara Ferro, Atenea García, Miguel Gendre, Raquel Nogueira Watson, Alba Recondo, Ana Santos Maneiro, Lois Soaxe, Jorge Varandela e Antía Vidal.
Horarios e venda de entradas
As funcións de Os actos e as profecías desenvolveranse de mércores a domingos ás 18,00 h., cun segundo pase ás 21,00 h. os venres e os sábados. A venda de entradas xa está dispoñible en ataquilla.com e tamén poderán adquirirse no despacho de billetes do Salón Teatro desde dúas horas antes do comezo de cada representación.
Como actividade complementaria a esta produción, os días 8, 15 e 22 de maio levaranse a cabo as Improversións que, en colaboración con The Momento Impro, achegaranlle ao público unha serie de improvisacións con esta produción como punto de partida.
A Filmoteca de Galicia inicia en maio unha retrospectiva arredor do actor italiano Marcelo Mastroianni como parte dunha carteleira na que tamén sobresaen as visitas de dous destacados nomes do actual panorama cinematográfico estatal: Alauda Ruiz de Azúa e Albert Serra. A oferta mensual da cinemateca da Xunta arranca este venres 2 con Corazón Salvaje, que se exhibe na recta final da homenaxe que se lle está a dedicar ao director David Lynch tralo seu recente pasamento. A nova programación inclúe tamén un repaso ás tres longametraxes do cineasta galego Raúl Veiga e a habitual colaboración co festival Play-Doc de Tui, que desta volta pon o foco en dúas figuras do cinema independente norteamericano: Monte Hellman e Elaine May.
Ou Yeah! é unha nova iniciativa arraigada no territorio, comprometida coa súa xente e deseñada para proxectar Ourense ao mundo. A súa esencia é a transformación: do local ao global, do tradicional ao contemporáneo, do escenario ao prato, do concerto ao encontro. Deste xeito, o festival, que ten como columna vertebral o rock, entendido nun sentido amplo, plural e actual, conxuga música, gastronomía, identidade e impacto territorial. Ou Yeah! espallarase pola provincia de Ourense entre os meses de xullo e outubro de 2025. O primeiro concerto terá lugar na capital da provincia, na explanada de Expouerense, o sábado 12 de xullo, da man de bandas de referencia internacionais, nacionais e galegas como The Waterboys, Morgan, Escuchando Elefantes e Tesouro.
