sábado, 14 de marzo de 2026
O Congreso dos Deputados deu onte un mandato claro ao Goberno de España, que é o mesmo que lle demos os gobernos autonómicos no Consello Interterritorial do Sistema Nacional de Saúde: que esas reformas non poden agardar máis, -aseverou o conselleiro-, que lembrou que a meirande parte destas demandas están pendentes desde abril do ano 2018, cando foran acordadas de xeito unánime no Consello Interterritorial por Ministerio e gobernos autonómicos.
O responsable do departamento sanitario da Xunta salientou que os únicos votos contrarios aos puntos onte aprobados foran dos grupos parlamentarios de PSOE e Sumar: é lamentable que os únicos partidos que negan a urxencia destas medidas sexan precisamente os que teñen na súa man executalas desde o Goberno de España, mentres que os que temos responsabilidades de xestión sanitaria nas comunidades autónomas, sexamos do partido que sexamos, clamamos por que se nos permita formar a máis especialistas para poder contratalos nos nosos centros de atención primaria.
O conselleiro remarcou as dificultades que están a ter o conxunto de comunidades autónomas para cubrir as baixas e as ausencias dos profesionais na atención primaria, ao estar baleiras as listas de contratación.
Nomeadamente, a iniciativa aprobada onte, ao igual que o manifesto promovido por Galicia, fai fincapé en que é preciso realizar un incremento extraordinario de 1.000 prazas anuais na oferta formativa da especialidade de medicina familiar e comunitaria, ademais de modificar o sistema de elección de prazas MIR, de xeito que non queden prazas sen cubrir.
Para facelo, proponse unha flexibilización dos criterios fixados para a acreditación das unidades formativas. A rixidez dos requisitos actuais provoca que dos máis de 460 centros de saúde cos que conta Galicia, soamente 100 teñan a posibilidade de formar novos especialistas.
Entre o conxunto de solicitudes da Xunta de Galicia ao Goberno central agora respaldadas polo Congreso, tamén se atopa a de acelerar os prazos para a entrada en vigor da nova especialidade de Urxencias e Emerxencias, que evitaría que entre o 25 e o 30% dos facultativos que ocupan prazas formativas de Medicina Familiar e Comunitaria rematen traballando en urxencias, posto que non teñen opción de formación propia.
A Xunta de Galicia puxo en marcha a plataforma PRESENTES.gal, unha ferramenta pública destinada a visibilizar o talento feminino galego e facilitar a presenza de mulleres expertas nos espazos de debate, coñecemento e divulgación. Impulsada pola Consellería de Política Social e Igualdade, esta iniciativa constitúe a maior comunidade dixital de mulleres profesionais de Galicia, co obxectivo de facilitar que organizadores de eventos, institucións, empresas ou medios de comunicación poidan localizar referentes femininos nos distintos ámbitos profesionais.
O proxecto, que leva por nome Ways, usa o concepto do Camiño de Santiago para conectar á cidadanía coa ciencia inspirándose no espírito de intercambio e mobilidade que caracteriza á Ruta Xacobea. Con esta finalidade, proponse converter o proxecto nun percorrido europeo que une tres rexións: Galicia (España), Pomorskie (Polonia) e Emilia-Romagna (Italia) a través das cidades de Santiago, Gdynia, Rávena e Módena. A Comisión Europea é a institución encargada da convocatoria, denominada Science Comes to Town e que acada a súa terceira edición. A través dela, financia iniciativas que achegan a ciencia á sociedade. Apoia a organización de eventos públicos como festivais, obradoiros ou actividades educativas co obxectivo de promover a cultura científica, fomentar o interese pola investigación e fortalecer a relación entre ciencia e cidadanía.
