sábado, 14 de marzo de 2026
No acto de inauguración destas xornadas participou hoxe o secretario xeral de Política Lingüística, Valentín García, quen destacou o papel da dita rede para difundir ao longo destes 20 anos o extraordinario valor da LIX en lingua galega e poñela no lugar que lle corresponde.
O Seminario está aberto ao público xeral e reúne entre hoxe e mañá numerosos representantes do ámbito galego, castelán, catalán, vasco e portugués, así como outros chegados do Brasil, Chile e México para intercambiar experiencias e presentar os proxectos de investigación que manteñen en activo ao redor da literatura infantil e xuvenil. A programación completa pode consultarse no Portal da Lingua Galega.
20 anos promovendo a literatura infantil
A Rede Temática de Investigación Las Literaturas Infantiles y Juveniles del Marco Ibérico e Iberoamericano é un grupo multidisciplinar e multicultural composto por profesorado de distintos ámbitos lingüísticos ibéricos e iberoamericanos que achegan claves estéticas para xulgar o feito literario.
Cada ano, coa pretensión de ofrecerlles ferramentas útiles a aquelas persoas mediadoras entre o libro e a lectura, a rede presenta un novo monográfico que recompila e analiza as lecturas recomendadas para a mocidade arredor dun tema concreto. Nestes 20 anos os volumes xa trataron aspectos como a vellez, o cómic, as mulleres como axentes literarios, as guerras, o multiculturalismo, a inmigración ou o teatro.
Somos hip-hop
Tamén orientado a un público lector xuvenil, o secretario xeral de Política Lingüística presentou hoxe o volume Somos hip-hop. Fundamentos do breaking, rap, graffiti, turntablism e beatbox, da autoría de Pablo Castiñeira e David Brey.
A través deste libro, producido pola entidade Vella Escola, os lectores e lectoras adentraranse no universo do hip-hop, nado na década dos 70 en Nova York, para descubrir os fundamentos, trucos e segredos de cada unha das disciplinas deste movemento sociocultural.
A proposta, a primeira que afonda neste campo en lingua galega, contén unha ampla colección de imaxes orixinais, ademais dun código QR que permite acceder a contidos exclusivos e realidade aumentada.
A Xunta de Galicia puxo en marcha a plataforma PRESENTES.gal, unha ferramenta pública destinada a visibilizar o talento feminino galego e facilitar a presenza de mulleres expertas nos espazos de debate, coñecemento e divulgación. Impulsada pola Consellería de Política Social e Igualdade, esta iniciativa constitúe a maior comunidade dixital de mulleres profesionais de Galicia, co obxectivo de facilitar que organizadores de eventos, institucións, empresas ou medios de comunicación poidan localizar referentes femininos nos distintos ámbitos profesionais.
O proxecto, que leva por nome Ways, usa o concepto do Camiño de Santiago para conectar á cidadanía coa ciencia inspirándose no espírito de intercambio e mobilidade que caracteriza á Ruta Xacobea. Con esta finalidade, proponse converter o proxecto nun percorrido europeo que une tres rexións: Galicia (España), Pomorskie (Polonia) e Emilia-Romagna (Italia) a través das cidades de Santiago, Gdynia, Rávena e Módena. A Comisión Europea é a institución encargada da convocatoria, denominada Science Comes to Town e que acada a súa terceira edición. A través dela, financia iniciativas que achegan a ciencia á sociedade. Apoia a organización de eventos públicos como festivais, obradoiros ou actividades educativas co obxectivo de promover a cultura científica, fomentar o interese pola investigación e fortalecer a relación entre ciencia e cidadanía.
