martes, 22 de julio de 2025
O Festival Converxencias Portugal-Galicia chega á súa 10ª edición cunha ampla programación cultural composta por música, teatro, danza e literatura que se repartirá do 3 de febreiro ao 9 de marzo entre as localidades de Braga, Ponteareas, A Estrada, Padrón e Santiago de Compostela co apoio da Xunta de Galicia.
Así informou esta mañá en rolda de prensa o secretario xeral de Política Lingüística, Valentín García, que destacou como prato forte desta edición tan especial a participación do músico Amancio Prada, un dos máximos expoñentes da proxección que a música e a literatura galegas teñen tanto no resto de España como a nivel internacional, neste caso en Portugal.
O cantautor español actuará o 25 de febreiro no Teatro Circo de Braga acompañado da Orquestra Filharmónica de Braga, o grupo portugués Canto D´Aquí e Coro do Pais do Conservatorio Gulbenkian, tamén de Braga, no que será un tributo a Zeca Afonso e Rosalía de Castro.
Canda o representante da Consellería de Cultura, Educación, FP e Universidades tamén participaron no acto de presentación o propio Amancio Prada; Jaime Torres, coordinador do grupo Canto D´Aquí; Anxo Angueira, presidente da Fundación Rosalía de Castro; Ricardo González, concelleiro de Cultura de Ponteareas, e Alberto Paz-Félix, profesor do Centro de Estudos Galegos da Universidade do Minho.
Un mes de programación cultural
Como cada ano, este certame cultural programa unha serie de actividades arredor do 23 de febreiro, data de nacemento de Rosalía de Castro e de pasamento do cantautor portugués Zeca Afonso, estreitando os lazos que unen Galicia e Portugal e evidenciando as semellanzas entre as súas linguas e culturas. Ademais, este ano inclúe unha publicación conmemorativa do 10º aniversario.
A programación, que reúne diferentes persoeiros do mundo cultural das dúas beiras do Miño, como Uxía ou Adriana Moreira, entre moitos outros, abrirase este sábado 3 no Teatro Principal da Estrada cun concerto de fusión tradicional interpretado pola Banda de Música Municipal da Estrada e Canto D´Aquí. O broche final a máis dun mes de programación porao outro concerto, neste caso o da Orquestra de Cordofones Tradicionais de Braga e a Orquestra local de Ponteareas, que terá lugar no dito concello pontevedrés. As actividades, datas e localizacións, poden consultarse no Portal da Lingua Galega.
10 anos festexando os lazos coa lusofonía
Promovido polo grupo Canto D´Aquí e o Centro de Estudos Galegos da Universidade do Minho, pertencente á Rede de Centros de Estudos Galegos e Lectorados da Xunta, co apoio doutras institucións como a Fundación Rosalía de Castro, o obxectivo deste festival é dar cumprimento á Lei 1/2014, do 24 de marzo, para o aproveitamento da lingua portuguesa e vínculos coa lusofonía, máis coñecida como Lei Valentín Paz-Andrade.
O 112 Galicia rexistra os seus picos de emerxencia durante as tardes e noites de verán. Os meses estivais traen consigo un cambio nos hábitos da poboación galega: días máis longos, noites máis activas e un aumento significativo das incidencias xestionadas polo 112. Segundo os datos, as franxas horarias con maior demanda son as 15:00 e as 20:00 horas, coincidindo cun estilo de vida máis intenso e prolongado durante o verán. En 2023, o servizo rexistrou medias de 1.300 intervencións entre as 15:00 e as 16:00 horas, e case 1.500 (1.484) entre as 19:00 e as 20:00 horas durante xuño, xullo e agosto. Aínda que en 2024 houbo un descenso global de incidencias (233.289 anuais), estas franxas mantiveron cifras elevadas: máis de 1.000 chamadas á tarde e 1.200 á noite no mesmo período.
O Goberno galego incrementará o orzamento destinado á formación do persoal dos servizos de prevención de incendios forestais ata os 1,8 millóns de euros no bienio 2025-2026, o que supón un 19% máis que no período anterior. Esta medida enmárcase no Plan de Prevención e Defensa contra os Incendios Forestais de Galicia (Pladiga), cuxo obxectivo é minimizar o impacto ecolóxico, económico e social dos lumes, optimizando os recursos dispoñibles. O compromiso formativo da Consellería do Medio Rural xa se reflectiu en 2024, cando se impartiron 473 cursos con 11.447 participantes e máis de 108.000 horas de adestramento.
