jueves, 29 de octubre de 2026
O visor interactivo ofrece a posibilidade de planificar rutas pola nosa comunidade seleccionando o nivel de dificultade desexado, o que fai que, ademais de seguras e naturais, sexan axeitadas para as familias.
Cada un dos percorridos que ofrece a plataforma contén fichas descargables con información sobre o mesmo, mapas, perfís de terreo, e localización de miradoiros e lugares de interese paisaxístico. Por outra banda, e co obxectivo de facilitar a planificación de cada ruta, ofrécese a posibilidade de almacenala en reloxos intelixentes, GPS, dispositivos móbiles, ou incluso na plataforma Wikiloc (que conta con 10 millóns de usuarios).
Este proxecto é froito do traballo do Instituto de Estudos do Territorio (IET) e da Federación Galega de Ciclismo, que procuraron ofrecer unha experiencia turística e de ocio diferente, e que permita descubrir desde a bicicleta as paisaxes galegas e todo tipo de elementos de interese turístico. Deste xeito, combínase o deporte coa conservación do patrimonio natural e coa posta en valor do territorio.
Ata o momento, A paisaxe galega desde a bicicleta xerou un grande interese que supuxo máis de 14.400 visitas e 950 descargas en distintos tipos de dispositivos. Trátase, en definitiva, dunha alternativa de lecer sostible, integrador e saudable, que contribúe a diminuír a circulación do tráfico de vehículos e as emisións de dióxido de carbono, contribuíndo así á mitigación dos efectos do cambio climático.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
