viernes, 23 de octubre de 2026
O británico Paul Weller encabeza o cartel deste ano do Underfest SON Estrella Galicia, evento musical que converterá Vigo nun gran escenario co apoio da Xunta, ao distribuír os 14 concertos por diferentes recintos. O Museo Marco, o Auditorio Mar de Vigo ou as salas Masterclub e La Iguana Club son algúns dos espazos que acollerán os concertos entre este venres e o sábado.
O apoio do Executivo galego á organización deste encontro canalízase por unha dupla vía. Por unha banda, a través das subvencións a festivais profesionais de música e, pola outra, de FEST Galicia, marca de calidade coa que a Xunta procura difundir a nosa Comunidade como territorio de referencia para a celebración deste tipo de eventos, tanto desde o punto de vista da excelencia no eido musical como no campo da xestión profesional.
O director da Axencia Galega das Industrias Culturais, Jacobo Sutil, participou esta mañá na presentación do Underfest xunto a Raquel Seijo e David Lago, responsables de Sweet Nocturna, promotora do festival, e representantes doutras entidades colaboradoras. Na súa intervención, Sutil puxo en valor o atractivo e o perfil internacional deste encontro, que lle brinda ao público vigués unha cita musical de primeiro nivel.
Underfest, lembrou o representante da Xunta, súmase ademais este ano a axenda global de máis 2500 citas artísticas que a Consellería de Cultura, Educación, FP e Universidades está a desenvolver ao longo do verán. Un completo e variado calendario que, baixo o nome de A Cultura en Galicia é un CulturON, vén incluíndo desde xuño accións divulgativas nos museos, mostras de artes escénicas e encontros musicais como o Underfest, entre outras iniciativas.
Apertura no Marco
O Underfest abrirá a súa programación o venres ás 18,30 h no Panóptico do Museo Marco con Sam Amidon, cantante estadounidense referente do folk-rock; e continuará unha hora despois no propio centro expositivo situado na rúa Príncipe con Queidem, artista valenciano que presenta o seu álbum debut: Evitaremos todo mal.
A Sala Kominsky recibirá o trío indie-rock Ciel ás 20,15 h, e La Iguana Club acollerá o dúo británico Blood Red Shoes ás 21,00 h. A primeira xornada rematará da man de PVA, que grazas ao seu primeiro disco Blush é un referente no circuíto de clubs londiniense.
O segundo día do festival continuará coa actividade da man coa artista ecuatoriana La Torre no Marco ás 18,00 h. e dúas horas despois, ás 20,00 h, o Auditorio Mar de Vigo recibirá a Paul Weller, o lendario músico británico cuxa ampla traxectoria comezou a finais dos setenta ao fundar bandas como The Jamp.
La Élite, formación catalá que ofrece un directo moi eléctrico e irreverente, actuará en La Iguana CLub ás 22,30 h, mentres que o dúo español _Juno fará o propio ás 20,45 h con Radar. A banda andaluza Los Mejillones Tigre arribará á Kominsky ás 22,30 h. Ao fío da media noite, Alex Silva estará en Radar Estudio e o trap con sons tropicais de Mueveloreina, resoará na Mogambo. Yung Prado, á unha da madrugada, porá o broche aos dous días de festival na sala Radar.
Exposición e entradas
Underfest achégalle ao público actividades máis alá do apartado de actuacións musicais. Sen ir máis lonxe, o festival inaugura este mesmo mércores, como aperitivo ao cartel, unha exposición na Galería Maraca, espazo que acolleu hoxe a presentación aos medios. Baixo o título Rockink Gig Poster Show, a mostra recompila obras de dez dos cartelistas máis recoñecidos do país, entre os que se atopan galegos como Rubén Suárez. Para a inauguración, cóntase co concerto de Henry Warrington.
As entradas para os diferentes concertos que aínda contan con localidades dispoñibles atópanse á venda na páxina web de Underfest. Os abonos para o programa completo están esgotados xa, como a entrada conxunta para os concertos do sábado.
A primeira etapa da xira de A Gaivota, ensaio aberto desenvolveuse do 12 ao 15 de outubro na sala Atahualpa do Teatro El Galpón de Montevideo, en coprodución con esta institución e no marco do Festival Internacional de Artes Escénicas de Uruguai, FIDAE. O programa comprendeu sete representacións nas que Déborah Vukuić compartiu escenario con Camila Durán e Claudia Trecu, que entraron no lugar das actrices galegas Uxía Suevos e Mercedes Castro. A magnífica resposta do público uruguaio contou cunha destacada presenza da comunidade galega, que converteu as funcións nun espazo de encontro arredor da lingua e da creación escénica de Galicia. Esta acollida precede a chegada á Arxentina, onde Déborah Vukuić compartirá escenario coas actrices locais Eugenia Alonso e Carmela Rivero.
Trátase dunha iniciativa que nace como evolución de Circo Presente Continuo e que se vai desenvolver por primeira vez fóra de Madrid. A Cidade da Cultura, o Teatro Principal e o Salón Teatro serán as súas sedes na capital galega, reunindo artistas, compañías, profesionais da programación, distribuidoras e institucións para compartir proxectos e favorecer novas oportunidades de colaboración e contratación. O programa inclúe oito espectáculos, seis mostras breves e catro traballos en proceso. Entre as propostas figuran Naufragio, de Labsurda; Serena, de Circ Bover; Matrimonio, de Kolektivo Konika; Siku, de Jessica Arpin; e Sen patrón, de Pistacatro, que ofreceu un adianto artístico durante a presentación.
