sábado, 8 de agosto de 2026
O director xeral de Relacións Exteriores e coa Unión Europea, Jesús Gamallo, representou a Galicia na fundación do Foro Celta, que celebra a súa primeira xuntanza en Rennes (Francia). Nesta reunión, os sete territorios participantes manifestaron o seu desexo de profundar nas súas relacións e colaboración, potenciando os vínculos históricos, xeográficos e económicos que comparten. Orixinalmente previsto para o pasado mes de marzo, o I Foro Celta contou coa participación de Galicia, o Principado de Asturias, as rexións de Bretaña (Francia) e de Cornualles (Inglaterra), e os gobernos das nacións de Escocia, Gales e Irlanda.
Jesús Gamallo participou xunto cos representantes dos demais territorios en tres mesas redondas, nas que se debateu sobre a importancia de reforzar as relacións entre os países celtas e a coordinación para colaborar nas prioridades de actuación definidas durante o coloquio. As mesas redondas centráronse nas enerxías renovables, a cultura e a xuventude como eixos vertebradores para a superación de barreiras e a consolidación do compromiso de colaboración cara ao futuro, coa fin de converter a unión destes territorios en motor de desenvolvemento sustentable, prosperidade e benestar para as súas poboacións.
Cooperación cultural estable
Gamallo presentou unha proposta da Xunta para manter unha cooperación cultural estable como vía para poñer en valor os respectivos legados culturais e patrimoniais, ao tempo que permite incrementar os nexos en áreas como o turismo. O director xeral incidiu na experiencia das peregrinacións xacobeas en Galicia como base para desenvolver iniciativas nesta liña.
En canto á mocidade, sinalou a necesidade de potenciar o intercambio facilitando a mobilidade, co desenvolvemento de programas específicos similares ao Erasmus coas rexións que xa non forman parte da Unión Europea, e a creación de colectivos de mozos e mozas con intereses comúns.
A maiores dos tres eixos principais do encontro, remarcou a importancia da pesca e o marisqueo como áreas globais para todos os territorios que miran ao Atlántico, e dun liderazgo das rexións celtas para garantir a sustentabilidade neste eido, a través da cooperación en forma de intercambio de experiencias e investigacións na materia.
A Declaración de Rennes, asinada por todos os asistentes, recolle a aposta destes pobos por reforzar a cooperación intercéltica nas relacións institucionais, no eido das actividades marítimas, na educación e a formación a prol da mobilidade, na valorización, promoción e coñecemento do patrimonio, e no desenvolvemento das enerxías renovables. Inclúense tamén as relacións culturais, especialmente nos ámbitos audiovisual, cinematográfico, do espectáculo en vivo e nas prácticas artísticas, así como no ámbito das linguas. Apóstase ademais por afondar nas relacións a través das respectivas diásporas e as económicas no eido da innovación e a investigación.
O Foro Celta nace co obxectivo fundamental de converter a unión destes territorios en motor de desenvolvemento sustentable, de prosperidade e de benestar para as súas poboacións. Trátase así de sumar esforzos para a posta en valor do patrimonio cultural destes territorios, da optimización dos recursos comúns e a posta en común dunha visión de futuro compartida.
Jesús Gamallo valorou positivamente a cooperación entre os pobos celtas, un dos moitos brazos de Galicia no exterior, como a emigración en Latinoamérica, en Europa ou as relacións coa lusofonía. Gamallo tamén lembrou que a pesar do Brexit, as relacións con Gales, Escocia e Cornualles nunca se detiveron en órganos como a Conferencia de Rexións Periféricas e Marítimas (CRPM) ou o grupo de contacto entre o Comité Europeo das Rexións e o Reino Unido, con Galicia participando activamente en ambos.
Unha maior cooperación bilateral entre Galicia e Bretaña
No Foro Celta tamén se produciu a sinatura dun Protocolo de intencións entre Galicia e a Bretaña francesa, con vistas a traballar na sinatura dun Memorando de entendemento entre ambas as rexións atlánticas. Este compromiso busca identificar ámbitos de colaboración en materia cultural, educación e económica, fixando uns retos de futuro comúns, como as enerxías verdes, a protección do sector pesqueiro e unha agricultura sustentable e descentralizada.
Para acadar este obxectivo acordouse promover unha coordinación que permita defender posturas comúns nas redes europeas, como o Comité das Rexións ou a Conferencia de Rexións Atlánticas Periféricas, e defender o establecemento dunha macrorrexión atlántica.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
