miércoles, 2 de julio de 2025
A Xunta aposta pola xeración de sinerxías con Portugal que permitan seguir estando á vangarda da cooperación e mellorando a economía e a capacidade de atender a cidadanía. Así o sinalou o vicepresidente segundo e conselleiro de Presidencia, Xustiza e Deportes, Diego Calvo, no encontro co presidente da Comisión de Coordinación e Desenvolvemento Rexional do Norte de Portugal (CCDR-N), Antonio Cunha, organizado pola Confederación de Empresarios de Galicia.
Diego Calvo destacou como un dos obxectivos prioritarios do Goberno galego a busca de novas vías de colaboración co país luso para a consolidación da Eurorrexión como referente de cooperación institucional, económica e cultural. Así, animou o empresariado galego a seguir construíndo pontes de cooperación e desenvolvemento conxunto para gañar competitividade, innovación e atractivo no territorio transfronteirizo, así como para un maior aproveitamento dos fondos europeos.
O vicepresidente segundo da Xunta incidiu na sólida relación existente entre Galicia e Portugal e referiuse aos sectores da automoción, a enerxía, a biotecnoloxía, o agroalimentario ou o téxtil como retos compartidos no actual contexto de transición enerxética e dixital. Son eidos para afianzar as relacións económicas e comerciais, e consolidar o potencial da Eurorrexión Galicia-Norte de Portugal e impulsar a súa competitividade, apuntou.
Nesta liña, referiuse á necesidade de que a fachada atlántica dispoña dun corredor de infraestruturas de transporte modernas, seguras e intermodais como clave para consolidar esa competitividade, como son o corredor atlántico ou a saída sur da alta velocidade.
Cooperación transfronteiriza
No eido da cooperación, Diego Calvo salientou que a Eurrexión Galicia Norte de Portugal se consolidou como a área máis dinámica na captación de fondos do Programa Operativo de Cooperación Transfronteriza Interreg España-Portugal (POCTEP) e avanzou que xa está a traballar nos proxectos das primeiras convocatorias do novo POCTEP 2021-2027 que se prevén poñer en marcha este ano.
O presidente da Xunta, Alfonso Rueda, resaltou hoxe que Galicia asumirá desde mañá 'a plena xestión sobre o seu litoral', un 'feito histórico desde o punto de vista do autogoberno' que virá acompañado da posta en marcha de xeito inmediato de dous novos servizos, unha nova canle de información á cidadanía e a posibilidade de unificar nun só formulario calquera trámite ou solicitude sobre o litoral. Deste xeito, o Goberno autonómico prepárase para asumir o autogoberno pleno do litoral co traspaso efectivo a Galicia a partir de mañá das funcións, medios e servizos en materia de ordenación costeira.
A primeira fase do piloto do proxecto Xenoma Galicia permitiu detectar, entre os máis de 1.000 participantes aos que se lle recolleu unha mostra de sangue, 14 novos casos de alto risco para as patoloxías investigadas de cancro de mama e ovario hereditario, síndrome de Lynch e hipercolesterolemia familiar. A Consellería de Sanidade presentou esta mañá ante o Consello da Xunta un informe de situación do piloto do proxecto Xenoma Galicia. Cun investimento de 20 millóns de euros, o Goberno galego márcase o obxectivo de recompilar o ADN de 400.000 persoas. Pola porcentaxe de poboación incluída, Xenoma Galicia é un dos proxectos de maior envergadura do mundo. Permitirá ofrecer tratamentos farmacolóxicos individualizados, predicir o risco de enfermidades antes de apareceren para poder anticiparse a elas e evitalas grazas ao estudo do xenoma e da historia clínica.
