domingo, 8 de noviembre de 2026
O mandatario galego valorou a estensión dos Polos creativos xa que supón consolidar o sistema educativo galego á vangarda no uso e aprendizaxe da novas tecnoloxías. Así pois, máis de 1.200 centros educativos contarán con este servizo. Para iso, segundo concretou, a Xunta investirá 19 millóns, tal e como se recolle no informe elevado hoxe ao Consello da Xunta.
Os beneficiarios serán arredor de 1.000 novos centros, que se sumarán aos 225 polos xa implantados este ano (218 en colexios e outros 7 nos centros de formación e recursos nas catro provincias). A maiores, tamén disporán do material todas as aulas hospitalarias e haberá kits específicos para a atención domiciliaria.
Rueda avanzou que, en total, se despregarán máis de 80.000 unidades de equipamento especializado de audiovisual e fotografía, electrónica e robótica, fabricación e construción e téxtil e informática, con kits adaptados aos niveis educativos aos que van dirixidos. Haberá kits de electrónica básicos e avanzados para diferentes idades, robots de chan e programables, placas microbit, microcontroladores, sistemas domóticos, circuítos de papel, escaneado e impresión 3D, tabletas, xogos de construción de pezas encaixables e sistemas para a creación de audiovisuais, entre outros.
O presidente da Xunta precisou que o importe total destas máis de 80.000 unidades acada os 13 millóns de euros aos que se suman outros 6 millons específicos para accións de formación, apoio e acompañamento ao profesorado en materia STEM. Isto inclúe a posta á disposición dos centros de recursos software baseados en procesos de intelixencia artificial, como o procesamento de linguaxe natural, a visión artificial, a xeración de imaxes ou música ou o marchine learning.
Rueda salientou o feito de que esta iniciativa tamén se adaptará para os nenos e nenas que, por enfermidade, reciben a educación no hospital ou na casa.
Galicia, polo de innovación educativa
Os Polos creativos están deseñados como lugares de innovación educativa no que se traballan as competencias STEM, a co-creación, a solución de problemas reais e o pensamento de deseño e habilidades. Teñen un deseño modular e innovador e contan con equipamento especializado e organizados didacticamente para fomentar a creatividade, a aprendizaxe por competencias e o traballo manipulativo.
As actividades que se desenvolven neles abordan aspectos como a intelixencia artificial, as tecnoloxías intensivas, o procesado audiovisual e artístico, a realidade virtual ou a robótica, entre outros.
O obxectivo desta novidosa acción, que comezou neste curso coa implantación de 225 Polos creativos e un investimento de 8 millóns de euros, e que agora se completa para todos os centros, é o de avanzar cara un modelo de infraestruturas educativas máis innovadoras que contribúan a consolidar Galicia como referente a nivel estatal na incorporación de tecnoloxías STEM (Ciencia, Tecnoloxía, Enxeñería e Matemáticas) ao proceso de ensino-aprendizaxe no sistema educativo público.
A acción enmárcase na folla de ruta da Estratexia galega de educación dixital e do Plan de nova arquitectura pedagóxica.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
