lunes, 26 de octubre de 2026
O Goberno galego participou activamente na elaboración da declaración conxunta, na que se destaca como os retos actuais do arco atlántico precisan dunha cooperación superior á existente, sendo a creación da macrorrexión atlántica fundamental e xustificada. A creación deste foro, segundo a declaración, debe contar con representación rexional. Ademais, a posta en marcha do corredor atlántico é considerada como un paso fundamental na cohesión e desenvolvemento destas rexións.
A declaración tamén fai balance da intención da Comisión Europea de vetar a pesca de fondo nas áreas mariñas protexidas, demandando un diálogo real co sector e as rexións concernidas antes de propoñer calquera cambio lexislativo na actual Política Pesqueira Común. A ampla participación galega neste encontro foi unha mostra da importancia da industria marítima na comunidade, así como a autoridade neste eido a nivel comunitario.
O director xeral de Relacións Exteriores e coa UE participou nos debates referidos á cooperación transatlántica, enerxías renovábeis mariñas e transición verde. Xunto a el tomaron parte outros galegos como Paloma Rueda, directora do Centro Tecnolóxico do Mar (CETMAR), ou Enrique Mallon, director da Asociación de Industrias do Metal e Tecnoloxías Asociadas de Galicia (ASIME).
Gamallo expuxo fronte os participantes a axenda enerxética de Galicia que fixa como obxectivo para 2030 que as renovables representen preto do 85 % da xeración eléctrica e 58 % do consumo, obxectivos máis ambiciosos cos fixados a nivel europeo. Tamén destacou a necesidade de investir en formación e reforzo das capacidades para facer fronte e aproveitar o potencial da transición ecolóxica. Sobre a cooperación transatlántica, o director xeral lembrou que as comunidades galegas máis importantes no exterior están na outra beira do Atlántico. Ademais, os lazos lingüísticos e culturais coa lusofonía achégannos en moitos eidos, incluída a pesca.
Conferencia de Rexións Periféricas e Marítimas
Nada en 1973, reúne a máis de 160 rexións da Unión Europea e doutros países. Ten entre os seus obxectivos o desenvolvemento máis equilibrado do territorio europeo, orientando a súa acción cara a toma en consideración nas políticas europeas das necesidades e intereses das súas rexións membro. Céntrase principalmente na cohesión social, económica e territorial, as políticas marítimas e a mobilidade.
A Comisión do Arco Atlántico é unha das súas seis comisións xeográficas. Reúne a 17 rexións de Irlanda, Reino Unido, Francia, España e Portugal co obxectivo de promover conxuntamente o seu potencial e a afrontar retos comúns. Galicia pertence a ela dende a súa creación en 1989.
O proxecto Xenoma Galicia, que conta cun investimento de 20 millóns de euros, ten por obxecto recompilar o ADN de 400.000 galegos para identificar os xenes relacionados co cancro de mama e ovario hereditario, a síndrome de Lynch e a hipercolesterolemia familiar. Ata o de agora, foron analizadas 3.112 mostras biolóxicas. En concreto, 1.037 mostras de sangue na primeira pilotaxe do proxecto, 796 de saliva no segundo piloto e, coa primeira fase do proxecto en marcha, 1.279 mostras dos voluntarios dos primeiros distritos participantes. A análise das mostras destes 1.279 participantes da fase 1 permitiu detectar 25 novos casos positivos. En concreto, 14 participantes deron positivo en cancro de mama e ovario hereditario, dous na síndrome de Lynch e nove en hipercolesterolemia familiar.
A Pedreira e Fillas de Cassandra estarán presentes no Womex 2026, o máis importante encontro mundial das músicas folk e de raíz que se celebra ata este domingo en Las Palmas de Gran Canaria. Trátase dunha iniciativa que ofrece aos artistas e ás empresas galegas un espazo para dar a coñecer o seu traballo ante programadores, festivais, axencias de contratación e outros profesionais de diferentes países. A artista foi escollida por un xurado internacional independente para formar parte dos Official Showcases, a selección oficial de concertos coa que Womex achega aos profesionais propostas das músicas do mundo.
