martes, 6 de mayo de 2025
A Xunta de Galicia suma 15 novos proxectos de dinamización do rural galego ao seu programa Territorio Cultura, no marco do que contribúe a ampliar e diversificar a oferta cultural galega en áreas non urbanas. Coa resolución desta segunda quenda de subvencións ao abeiro deste fondo. As axudas de 660.000 euros -aproximadamente a mesma cantidade o ano pasado- diríxense a empresas privadas que desenvolverán unha trintena de propostas en 85 concellos das catro provincias.
O conselleiro de Cultura, Educación, FP e Universidades, Román Rodríguez, mantivo esta mañá na Cidade da Cultura unha reunión de traballo cos responsables destas iniciativas para coñecer máis en detalle os seus obxectivos e contidos. Aproveitou, así mesmo, para felicitalos por apostar pola cultura como motor de revitalización do rural, que se deixa notar tamén nos ámbitos social, turístico e económico.
O director da Axencia Galega das Industrias Culturais, Jacobo Sutil, asistiu tamén a esta reunión, na que participaron as 11 empresas subvencionadas na segunda convocatoria destas axudas, así como os representantes dos catro concellos apoiados: Cerdedo-Cotobade, A Pobra do Brollón, As Pontes de García Rodríguez e Sarria.
Os proxectos abranguen numerosas accións de exhibición, divulgación, formación ou concienciación social e medioambiental, dirixidas a públicos moi diversos en ámbitos como a danza, o teatro, a música, o audiovisual, a literatura, as artes plásticas, o patrimonio inmaterial ou a innovación cultural.
Todas elas responden á finalidade de Territorio Cultura no sentido de reforzar e desenvolver as capacidades do sector cultural para acadar un tecido sólido máis alá dos grandes núcleos urbanos e contribuír, deste xeito, a incrementar a actividade cultural nas contornas rurais. Ao tempo, búscase activar procesos culturais nestas zonas que afonden nos vínculos individuais e sociais co territorio, ofrecendo novas oportunidades laborais, estables e de calidade, no eido cultural.
Modalidade para empresas culturais
Ao igual que na primeira convocatoria de 2022, as axudas desta segunda quenda distribúen entre dúas modalidades unha dotación de máis de 660.000 euros ao abeiro do Mecanismo Europeo de Recuperación e Resiliencia dos Fondos Next Generation EU.
A través da primeira delas, destinada á iniciativa privada, apóianse 11 novas propostas, entre as que se atopan Territorio Novoneyra como parte da programación expandida do VIII Festival dos Eidos, que inclúe actividades literarias en seis concellos da montaña lucense; o proxecto de danza Creación, investigación, redes e territorio, impulsado por A Casa Vella en Allariz, Baños de Molgas, A Bola, Vilar de Santos e Xunqueira de Ambía; Os andares, para a realización de documentais en formato audiopaseo nos concellos dos Ancares lucenses; Laboratorio mutante para a ecoloxía dos saberes, ideado por Outonía como unha proposta participativa de innovación cultural que se despregará en oito municipios de Lugo e Ourense; Mariña inmaterial, organizado por Ouvirmos para a recollida de patrimonio inmaterial en centros de maiores de Cervo, Barreiros, Trabada, O Valadouro e Xove cara á súa posterior difusión en diferentes formatos; e Cóntame un mundo, en localidades de oito concellos das provincias da Coruña, Lugo e Ourense, centrado tamén na recollida da tradición oral a través de foros con persoas da terceira idade e na súa transmisión ao resto de xeracións.
Tamén se atopan nesta listaxe Aldea Nova Ribeiro-Ribeira en Carballedo, Chantada, Leiro, Monforte de Lemos e O Saviñao, con experiencias que vinculan o medio ambiente coa arte e a ciencia; Cinema circulante, para lle achegar o mundo audiovisual ao público dunha decena de concellos lucenses e ourensáns; Lugares vivos, cunha programación que mestura o patrimonio cultural e natural da Ribeira Sacra coa música; A gárgola no rural, espectáculo multidisciplinar de A Xanela do Maxín arredor do que se desenvolverán diferentes accións de formación, difusión cultural e exhibición na Capela, Lousame, Meis, Toques e Zas; e Xacobeo Clarinet Fest, con concertos e cursos sobre este instrumento, que terá lugar en Lalín.
Categoría para concellos
Na modalidade para entidades locais, os adxudicatarios foron os concellos de Cercedo-Cotobade, cun proxecto de difusión da música de raíz baixo o título Cercedo-Cotobade en sons; A Pobra do Brollón para un programa descentralizado que inclúe concertos, regueifas, foliadas, romarías e obradoiros; As Pontes de García Rodríguez con De ponte a ponte, que organizará accións teatrais, de narración oral, música e poesía a carón das pontes históricas que unen algunhas das súas parroquias; e Sarria co festival A cultura do chocolate, con concertos, cinema, contacontos, obradoiros e showcookings, co chocolate como fío condutor.
Galicia ratificou hoxe o seu apoio pleno ao Pacto Europeo dos Océanos como plataforma fundamental para unificar a súa gobernanza e aliñar a protección do medio ambiente co seu uso sostible, e avogou pola integración plena da pesca e da acuicultura como piares centrais dese acordo. Durante un evento no Comité Europeo das Rexións celebrado en Bruxelas este mediodía, a directora-xerente do Centro Tecnolóxico do Mar-Fundación Cetmar, Rosa Chapela Pérez, defendeu que os sectores pesqueiro e acuícola sostibles 'non representan unha ameaza para a saúde dos nosos océanos'. Polo contrario, afirmou, 'son aliados esenciais para manter o seu equilibrio'.
O presidente da Xunta, Alfonso Rueda, informou hoxe de que a Xunta destinará no bienio 2025-2026 preto de 1,8 millóns de euros á formación e ao adestramento do persoal dos servizos de prevención de incendios forestais co fin de garantir a protección dos nosos montes de cara á tempada 'de maior risco de lumes'. Segundo sinalou Rueda, estas cifras supoñen un incremento de case o 19 % do orzamento, en comparación co bienio anterior. Con estes fondos, a previsión é financiar preto de 3.500 edicións de cursos e accións 'de formación e adestramento' ao longo do referido período. Así figura no Plan de formación integrado dentro do Plan de prevención e defensa contra os incendios forestais de Galicia (Pladiga) correspondente ao ano 2025, que hoxe aprobou o Consello do Goberno galego, unha vez oído o Consello Forestal de Galicia na súa xuntanza do pasado mércores, día 30 de abril.
