sábado, 7 de noviembre de 2026
Camiños creativos amosa unha ampla escolma da pintura paisaxista europea, sendo unha das poucas oportunidades de ver en Galicia obras de grandes paisaxistas ingleses como Turner ou Constable, incluíndo tamén instalacións cunha destacada compoñente lúdica e interactiva. Atopamos así desde obras que se moven pola sala de xeito autónomo a instalacións sensoriais que deben ser percorridas e experimentadas polo público: desde un corredor suspendido asinado por Cristina Iglesias unha das artistas españolas actuais con máis recoñecemento internacional, Premio Nacional de Artes Plásticas e premio de Arquitectura da Royal Academy ou un labirinto visual formado por 3.000 tubos de plástico translúcido do venezolano Jesús Rafael Soto destacada figura da arte óptica e cinética, presente en coleccións como a do MoMA.
Audiovisuais de grandes nomes da performance como Marina Abramović ou Mona Hatoum conviven no espazo expositivo con proxectos como as recoñecidas animacións con LED de Julian Opie, un dos creadores máis mediáticos dos últimos anos que ten traballado con bandas como Blur ou U2 realizando visuais para a súa xira Vértigo.
Programación para a Semana Santa
As exposicións do Museo Centro Gaiás e unha reforzada oferta de visitas comentadas centran a programación da Cidade da Cultura para esta semana festiva. Ata o domingo, os visitantes poderán coñecer polo miúdo a contorna arquitectónica e os espazos verdes do complexo a través de visitas guiadas de balde con tres quendas diarias a escoller (ás 12,30, 13,00 e 17,00 horas). Tamén se ve reforzada a oferta de visitas comentadas á exposición Camiños creativos nos seus últimos días.
A Semana Santa ofrece ademais unha oportunidade para achegarse ás outras dúas exposicións temporais que alberga o Museo Centro Gaiás actualmente: a escolma de arte contemporánea De lugares e cousas. Colección de Arte Banco Sabadell e Detrás do espello, un percorrido pola pegada de Galicia na vida e a obra de medio centenar de grandes nomes da cultura universal, comisariada por Antón Reixa e Xosé Luís García Canido.
Durante esta semana festiva continuarán a poder visitarse as mostras bibliográficas da Biblioteca e Arquivo de Galicia, entre as que destaca o proxecto Voces esquecidas. As mulleres do Hospital de Conxo, centrada na saúde mental desde unha perspectiva de xénero a partir dos arquivos históricos deste hospital psiquiátrico. Tamén a instalación artística Fitotario que converte as torres Hejduk nun invernadoiro interactivo no que as plantas soan ou se moven cando son tocadas estará aberta no seu horario habitual.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
